ఆవేశంతో గుడ్‌బై చెప్పినవాళ్లు తిరిగొస్తే ఆహ్వానిస్తాం:గండ్ర

హైదరాబాద్: ఆవేశంలో కాంగ్రెసు పార్టీకి గుడ్ బై చెప్పిన వారు తిరిగి వస్తే ఆహ్వానించేందుకు సిద్ధంగా ఉన్నామని వరంగల్ జిల్లా భూపాలపల్లి శాసనసభ్యుడు గండ్ర వెంకటరమణా రెడ్డి సోమవారం హైదరాబాదులో అన్నారు. తెలుగుదేశం పార్టీ అవిశ్వాసం పెడితే సమర్థవంతంగా ఎదుర్కొంటామన్నారు. టిడిపి అవిశ్వాసం పెడుతున్న నేపథ్యంలో అవసరమైన వ్యూహాన్ని తాము ఎంచుకుంటామని తెలిపారు. శాసనసభ సమావేశాల్లో అనుసరించాల్సిన వ్యూహం విషయమై చర్చించేందుకు వచ్చే నెల ఒకటో తారీఖున తెలంగాణ కాంగ్రెసు ఎమ్మెల్యేలమంతా సమావేశమవుతున్నట్లు చెప్పారు. ప్రత్యేక తెలంగాణ ఏర్పాటే తమ ధ్యేయమన్నారు.

అయితే ప్రస్తుత పరిస్థితుల్లో తెలంగాణపై తీర్మానం చేయాలని తాము పట్టుబట్టమని చెప్పారు. బిజినెస్ రూల్స్ ప్రకారం వ్యవహరిస్తామని చెప్పారు. టిడిపి పెట్టే అవిశ్వాసాన్ని సమర్థవంతంగా ఎదుర్కొంటామని పౌరసరఫరాల శాఖ మంత్రి శ్రీధర్ బాబు వేరుగా అన్నారు. కాంగ్రెసు పార్టీ బి-ఫారం ద్వారా ఎన్నికైన ప్రజాప్రతినిధులు అందరూ ఎప్పటికీ కాంగ్రెసులోనే ఉంటారని ఆకాంక్షించారు.

English summary

Congress MLA Gandra Venkata Ramana Reddy welcomed mlas who leaved Congress Party soon. He said government is ready to face tdp's no confidential vote.