వట్టిని చెప్పుతో కొట్టే వాడిని: టిడిపి ఎంపీ మోదుగుల

By Srinivas

Published: Monday, November 28, 2011, 15:41 [IST]

గుంటూరు: తమ పార్టీ శాసనసభ్యుడు చింతమనేని ప్రభాకర్‌కు జరిగినట్లు తన నియోజకవర్గంలో జరిగితే మంత్రి వట్టి వసంత్ కుమార్‌ను చెప్పుతో కొట్టే వాడినని తెలుగుదేశం పార్టీ నర్సారావుపేట పార్లమెంటు సభ్యుడు మోదుగుల వేణుగోపాల్ రెడ్డి సోమవారం విరుచుకు పడ్డారు. తెలుగుదేశం పార్టీ అధికారంలోకి వస్తే కాంగ్రెసు నేతల్ని అందర్నీ జైల్లో పెట్టిస్తానని ధ్వజమెత్తారు. గెలిచిన ఎమ్మెల్యేలను పక్కన పెట్టి ఓడిన కాంగ్రెసు నేతలకు రచ్చబండ కార్యక్రమంలో ప్రాధాన్యత ఇవ్వడమేమిటని ప్రశ్నించారు.

ప్రజలు తిరస్కరించినా సిగ్గులేకుండా కాంగ్రెసు తరఫున ఓడిన నేతలు వేదిక ఎందుకు ఎక్కారని ప్రశ్నించారు. రచ్చబండ కార్యక్రమం పార్టీలకు సంబంధించినది కాదన్నారు. దెందులూరు రచ్చబండలో చింతమనేనిపై జరిగిన దాడిని ఆయన ఖండించారు. అసలు మంత్రి వట్టి వసంత్ కుమార్, ఎంపీ కావురి సాంబశివ రావు ఎవరంటూ ప్రశ్నించారు. కాగా శనివారం దెందులూరు రచ్చబండ కార్యక్రమంలో మంత్రి వట్టి, స్థానిక ఎమ్మెల్యే చింతమనేని ప్రభాకర్ మధ్య బాహాబాహీ జరగటం తెలిసిందే.

Published On November 28, 2011