దారి తప్పిన మేధావి రామోజీ: జగన్ పార్టీ నేత పద్మ

By Pratap

Published: Monday, November 28, 2011, 17:53 [IST]

హైదరాబాద్: ఈనాడు గ్రూప్ సంస్థల అధినేత రామోజీరావుపై వైయస్ జగన్ నాయకత్వంలోని వైయస్సార్ కాంగ్రెసు పార్టీ నాయకురాలు వాసిరెడ్డి పద్మ తీవ్రంగా మండిపడ్డారు. రామోజీరావును దారి తప్పిన మేధావిగా ఆమె అభివర్ణించారు. ఈశాన్య రాష్ట్రాల ప్రయోజనాల గురించి మాట్లాడే రామోజీరావు, తెలుగుదేశం పార్టీ అధ్యక్షుడు నారా చంద్రబాబు నాయుడు తెలుగు ప్రజలకు జరిగిన వేల కోట్ల రూపాయల అన్యాయం గురించి ఎందుకు మాట్లడడం లేదని ఆమె సోమవారం మీడియా ప్రతినిధుల సమావేశంలో ప్రశ్నించారు. రోజుకో కథనంతో రామోజీ రావు ఈనాడు ద్వారా జగన్‌పై బురద చల్లే ప్రయత్నాలు చేస్తున్నారని ఆమె విమర్శించారు.

తెలుగు అక్షరాలను మలినం చేసిన ఘనత రామోజీరావుకే దక్కుతుందని ఆమె వ్యాఖ్యానించారు. పాత్రికేయ ముసుగులో అవినీతి సామ్రాజ్యానికి రామోజీ రావు కొమ్ము కాస్తున్నారని ఆమె విమర్శించారు. తనపై జరుగుతున్న సిబిఐ విచారణను కప్పి పుచ్చుకోవడానికి రామోజీ రావు ఇదంతా చేస్తున్నారని ఆమె అభిప్రాయపడ్డారు. వారి ప్రశ్నలకు తాము సమాధానం చెబుతున్నామని, కానీ తమ ప్రశ్నలకు రామోజీ రావు సమాధానం ఇవ్వడం లేదని ఆమె అన్నారు. నీతినియమాలు, నైతిక విలువలు ఉంటే తనపై వచ్చిన ఆరోపణల మీద రామోజీ రావు వివరణ ఇవ్వాలని ఆమె డిమాండ్ చేశారు.

Published On November 28, 2011