రాజగోపాల్‌కు కోర్టులో చుక్కెదురు, బెయిల్ నిరాకరణ

By Pratap

Published: Tuesday, November 29, 2011, 16:19 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో మాజీ ఐఎఎస్ అధికారి రాజగోపాల్‌కు మంగళవారం సిబిఐ కోర్టులో చుక్కెదురైంది. ఆయన దాఖలు చేసుకున్న బెయిల్ పిటిషన్‌ను కోర్టు తిరస్కరించింది. మరో రకంగా ఆయనకు ఊరట లభించింది. రాజగోపాల్‌ను ప్రత్యేక ఖైదీగా గుర్తించి, అదనపు సదుపాయాలు కల్పించాలని కోర్టు ఆదేశించింది. దీంతో రాజగోపాల్‌కు హైదరాబాదులోని చంచల్‌గుడా జైలులో ప్రత్యేకమైన సెల్‌ను కేటాయించి, అదనపు సౌకర్యాలు కల్పిస్తారు. ఈ కేసులో ఇప్పటికే గాలి జనార్దన్ రెడ్డి, ఒఎంసి మేనేజింగ్ డైరెక్టర్ శ్రీనివాస రెడ్డిలను కోర్టు ప్రత్యేక ఖైదీలుగా గుర్తిస్తూ ఆదేశాలు జారీ చేసింది.

గాలి జనార్దన్ రెడ్డి అక్రమ మైనింగ్ కేసులో ఆరెస్టయిన మూడో నిందితుడు రాజగోపాల్. ఈ కేసులో ఐఎఎస్ అధికారి శ్రీలక్ష్మిని సిబిఐ అధికారులు అరెస్టు చేసి, కోర్టు అనుమతితో మూడు రోజుల కస్టడీకి తీసుకున్న విషయం తెలిసిందే. ఈ కేసులో సిబిఐ డిసెంబర్ 3వ తేదీలోగా కోర్టులో చార్జిషీట్ దాఖలు చేయాల్సి ఉంది. గడువులోగానే చార్జిషీట్ దాఖలు చేస్తామని సిబిఐ చెబుతోంది.

Published On November 29, 2011