తొలగని ప్రతిష్టంభన, ఎఫ్‌డిఐపై పార్లమెంటు వాయిదా

న్యూఢిల్లీ: రిటైల్ రంగంలో ప్రత్యక్ష పెట్టుబడుల అనుమతిపై ప్రభుత్వం అఖిల పక్ష సమావేశం ఏర్పాటు చేసినా ప్రతిష్టంభన తొలగిపోలేదు. ఆ వివాదం మంగళవారం కూడా పార్లమెంటు ఉభయ సభలను కుదిపేసింది. రిటైల్ రంగంలో ఎఫ్‌డిఐని వ్యతిరేకిస్తూ ప్రతిపక్షాలు ముక్త కంఠంతో పార్లమెంటు ఉభయ సభల కార్యకలాపాలను అడ్డుకున్నాయి. దీంతో ఉభయ సభలు వాయిదా పడ్డాయి. లోకసభ సమావేశం కాగానే ప్రతిపక్షాల సభ్యులు లేచి ఎఫ్‌డిఐని వ్యతిరేకిస్తూ సభా కార్యక్రమాలను అడ్డుకున్నారు. దీంతో లోకసభ మధ్యహ్నం 12 గంటల వరకు వాయిదా పడింది. ఎగువ సభలోనూ ఇదే పరిస్థితి. దీంతో రాజ్యసభ కూడా వాయిదా పడింది.

అంతకు ముందు మంగళవారం అఖిల పక్ష సమావేశం జరిగింది. అయితే, ఈ సమావేశంలో ఏకాభిప్రాయం కుదరలేదు. కేంద్ర మంత్రి ప్రణబ్ ముఖర్జీ అధ్యక్షతన జరిగిన ఈ సమావేశంలో ఇరు పక్షాలు కూడా తమ పట్టును వీడలేదు. నిర్ణయాన్ని వెనక్కి తీసుకోవాల్సిందేనని ప్రతిపక్షాలు పట్టుబట్టాయి. ప్రతిపక్షాల మనోభావాలను ప్రధానికి తెలిపి, ప్రభుత్వం ప్రతిస్పందించడానికి కొంత సమయం కావాలని ప్రణబ్ ముఖర్జీ చెప్పినట్లు బిఎస్‌పి నాయకుడు సతీష్ చంద్ర మిశ్రా తెలిపారు. మంగళవారం మధ్యాహ్నం రెండు గంటల లోపు ప్రభుత్వం ఓ నిర్ణయానికి రావాలని ప్రతిపక్షాలు చెప్పినట్లు ఆయన తెలిపారు.

English summary

The row over FDI in retail continued to disrupt the functioning of Parliament with both Lok Sabha and Rajya Sabha adjourned after a united opposition refused to allow any proceedings for the sixth day.