ప్రముఖ రచయిత్రి ఇందిరా గోస్వామి కన్నుమూత

గౌహతి: ప్రముఖ రచయిత్రి, జ్ఞానపీఠ్ అవార్డు గ్రహీత ఇందిరా గోస్వామి మంగళవారం ఉదయం కన్నుమూశారు. అనారోగ్యం కారణంగా గత పది నెలలుగా ఆమె ఆసుపత్రిలో చికిత్స పొందుతున్నారు. మంగళవారం హఠాత్తుగా గుండెపోటుతో మృతి చెందారు. అస్సామీ రచయిత్రి అయిన గోస్వామి వయస్సు 69 ఏళ్లు. 1942 నవంబర్ 14న ఈమె జన్మించారు. గత ఫిబ్రవరి 12న కోమాలోకి వెళ్లిన ఆమె అప్పటి నుండి చికిత్స పొందుతున్నారు.

ఈమె 2005 నుంచి ఉల్ఫా ఉగ్రవాదులకు, ప్రభుత్వానికి మధ్య జరిగిన చర్చల్లో మధ్యవర్తిగా వ్యవహరిస్తున్నారు. 1982లో సాహిత్య అకాడమీ, 2000 సంవత్సరంలో జ్ఞానపీఠ్ అవార్డును ఆమె అందుకున్నారు. ఈమె నవల ఆధారంగా నిర్మించిన అదాజ్యా చిత్రం పలు అంతర్జాతీయ అవార్డులు గెలుచుకుంది. ఈమె జీవితాన్ని ఆధారంగా చేసుకొని జాను బారో అనే దర్శకుడు వర్డ్స్ ఫ్రమ్ ది మిస్ట్ అనే చిత్రాన్ని తీశారు.

English summary

Jnanpith award winning Assamese litterateur Indira Raisom Goswami, who was 70, died on Tuesday morning at 7.42 am after prolonged illness.