జగన్ ఎమ్మెల్యేలతో పోల్చుకుంటున్న చిరు ఎమ్మెల్యేలు

By Pratap

Published: Saturday, December 3, 2011, 15:24 [IST]

హైదరాబాద్: చిరంజీవి నాయకత్వంలోని ప్రజారాజ్యం పార్టీ శాసనసభ్యులు తమను వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శాసనసభ్యులతో పోల్చుకుంటున్నారు. వైయస్ జగన్ శానససభ్యులకు ఇస్తున్న ప్రాధాన్యం ముఖ్యమంత్రి కిరణ్ కుమార్ రెడ్డి తమకు ఇవ్వడం లేదని వారు చిరంజీవితో ఫిర్యాదు చేశారు. శనివారం ప్రజారాజ్యం పార్టీ శానససభ్యులు చిరంజీవితో సమావేశమై ప్రభుత్వం పట్ల తమ అసంతృప్తిని వ్యక్తం చేశారు. తమను పట్టించుకోవడం లేదని వారు ఆవేదన వ్యక్తం చేశారు. ప్రజారాజ్యం పార్టీని కాంగ్రెసులో విలీనం చేసి తప్పు చేశామని వారు అభిప్రాయపడ్డారు. ముఖ్యమంత్రి కిరణ్ కుమార్ రెడ్డితో ఏమీ జరగదని, కాంగ్రెసు అధ్యక్షురాలు సోనియా గాంధీతోనే తేల్చుకోవాలని వారు చిరంజీవితో చెప్పారు. శాసనసభ్యుల నుంచి ఒత్తిడి పెరిగిన నేపథ్యంలో చిరంజీవి తన వర్గానికి చెందిన శానససభ్యులతో రేపు సమావేశం ఏర్పాటు చేశారు.

కాగా, అవిశ్వాసంపై తీర్మానంపై చర్చను స్పీకర్ నాదెండ్ల మనోహర్ బిఎసి సమావేశంలో ఖరారు చేశారు. అవిశ్వాస తీర్మానాన్ని సోమవారంనాడు చర్చకు చేపట్టే అవకాశం ఉంది. అదే రోజు ఓటింగు కూడా జరుగుతుంది. కరువుపై చర్చ ముగిసిన తర్వాతనే అవిశ్వాస తీర్మానంపై చర్చకు తీసుకోవాలని నిర్ణయం జరిగింది. పది గంటలపాటు అవిశ్వాస తీర్మానంపై చర్చ జరిగే అవకాశం ఉంది. శాసనసభ సమావేశాలను మరో ఐదు రోజులు పొడగించాలని ప్రతిపక్షాలు చేసిన విజ్ఞప్తిని అధికార కాంగ్రెసు పార్టీ తిరస్కరించింది.

ప్రజారాజ్యం పార్టీ శాసనసభ్యులకు విప్ జారీ చేసే విషయంపై ప్రభుత్వ విప్ కొండ్రు మురళి చిరంజీవితో మాట్లాడారు. సాంకేతికంగా ప్రజారాజ్యం పార్టీ శాసనసభ్యులకు చిరంజీవి విప్ జారీ చేయాల్సి ఉంటుంది. కాగా, కాంగ్రెసు, తెలుగుదేశం పార్టీలు తమ శాసనసభ్యులకు విప్ జారీ చేశాయి.

Published On December 3, 2011