జగన్‌కు ఎదురుతిరిగిన సత్యవతి, ప్రభుత్వానికి బాసట

By Pratap

Published: Saturday, December 3, 2011, 22:18 [IST]

హైదరాబాద్: శాసనసభ్యురాలు కుంజా సత్యవతి వైయస్సార్ కాంగ్రెసు పార్టీ అధ్యక్షుడు వైయస్ జగన్ మాటకు ఎదురు తిరిగారు. ముఖ్యమంత్రి కిరణ్ కుమార్ రెడ్డి ప్రభుత్వంపై తెలుగుదేశం పార్టీ ప్రతిపాదించిన అవిశ్వాస తీర్మానానికి వ్యతిరేకంగా ఓటు చేయాలని నిర్ణయించుకున్నారు. తాను ప్రభుత్వానికి మద్దతిస్తామని చెప్పారు. వైయస్ జగన్ నిర్వహించిన శాసనసభ్యుల సమావేశానికి వెళ్లి వచ్చిన తర్వాత ఆమె మీడియా ప్రతినిధులతో మాట్లాడారు. వైయస్ రాజశేఖర రెడ్డి కష్టంతో ఏర్పడిన ప్రభుత్వాన్ని కూల్చడం తనకు ఇష్టం లేదని ఆమె చెప్పారు. ఈ ప్రభుత్వాన్ని కూల్చబోనని జగన్ కూడా గతంలో చెప్పారని ఆమె గుర్తు చేశారు.

తనకు వైయస్ రాజశేఖర రెడ్డి సీటు ఇవ్వడం వల్లనే గెలిచానని ఆమె చెప్పారు. వైయస్ జగన్ అంటే తనకు ప్రేమ, అభిమానం ఉన్నాయని, అయితే ప్రభుత్వాన్ని కూల్చడంలో తాను భాగస్వామిని కాబోనని ఆమె అన్నారు. ముఖ్యమంత్రి కిరణ్ కుమార్ రెడ్డి వైయస్ పథకాలనే కొనసాగిస్తున్నారని, ప్రజలకు అవి చేరువగా ఉన్నాయని ఆమె అన్నారు.

ఇదిలా ఉంటే, మంత్రి డొక్కా మాణిక్యవరప్రసాద్ వైయస్ జగన్ వర్గానికి చెందిన శాసనసభ్యుడు బాబూరావుతో చర్చలు జరిపారు. మరో ఇద్దరు జగన్ వర్గానికి చెందిన శాసనసభ్యులతో కూడా ఆయన చర్చలు జరుపుతున్నట్లు సమాచారం. తెలుగుదేశం పార్టీ అవిశ్వాసం ప్రతిపాదించిన నేపథ్యంలో ప్రభుత్వం జగన్ ఆపరేషన్‌ను చేపట్టింది. జగన్ వైపు పది మందికి మించి శాసనసభ్యులు లేకుండా చూడాలనే ప్రయత్నంలో ఉంది.

Published On December 3, 2011