ఎమ్మెల్యేలకు జగన్ క్లాస్, కొత్త ఎమ్మెల్యేల కోసం వేట

By Pratap

Published: Saturday, December 3, 2011, 16:27 [IST]

హైదరాబాద్: శానససభలో తెలుగుదేశం పార్టీ ప్రతిపాదించిన అవిశ్వాస తీర్మానాన్ని బలపరిచే విషయంలో వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తన వర్గానికి చెందిన శానససభ్యులకు క్లాస్ తీసుకున్నారు. ఆయన శనివారం తన వర్గానికి చెందిన శానససభ్యులతో సమావేశమయ్యారు. వారితో విడివిడిగానూ, కలిపి ఆయన మాట్లాడారు. అవిశ్వాస తీర్మానాన్ని బలపరిచి, ప్రభుత్వానికి వ్యతిరేకంగా శాసనసభలో ఓటేయాలంటున్న తన మాటను కాదంటున్నవారిపై ఆయన తీవ్రంగానే ప్రతిస్పందించినట్లు తెలుస్తోంది. చిత్తశుద్ధితో ఉండేవాళ్లే తనతో ఉండాలని ఆయన వారికి స్పష్టంగా సూచించినట్లు సమాచారం.

డబుల్ గేమ్ ఆడేవారు తన వద్దకు రావద్దని ఆయన హెచ్చరించినట్లు తెలుస్తోంది. ప్రభుత్వానికి వ్యతిరేకంగా ఓటేయడం వల్ల అనర్హతకు గురై ఉప ఎన్నికలు వస్తే తాను చూసుకుంటానని ఆయన వారితో అన్నారు. తాను అనర్హత వేటుకు భయపడబోమని, అవిశ్వాసానికి మద్దతుగా ఓటేస్తామని సమావేశానంతరం శాసనసభ్యుడు పిల్లి సుభాష్ చంద్రబోస్ చెప్పారు. శనివారంనాటి సమావేశానికి 22 మంది శానససభ్యులు హాజరయ్యారు. ప్రభుత్వాన్ని మరింత ఇరకాటంలోకి నెట్టడానికి కొత్త శాసనసభ్యులను తమ వైపు తిప్పుకునేందుకు కూడా జగన్ ప్రయత్నాలు సాగిస్తున్నట్లు సమాచారం. మరో 12 మందిని తన వైపు రాబట్టుకోగలిగితే ప్రభుత్వాన్ని పడగొట్టడం సులభం అవుతుందని ఆయన అనుకుంటున్నట్లు తెలుస్తోంది.

Published On December 3, 2011