మాకు పడగొట్టే సత్తా లేదనే చెబుతున్నాం: శోభా నాగిరెడ్డి

By Srinivas

Published: Sunday, December 4, 2011, 15:35 [IST]

హైదరాబాద్: తాము వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ధైర్యాన్ని చూసే ఆయన వెంట ఉంటున్నామని అలాగే తమకు ప్రభుత్వాన్ని పడగొట్టే సత్తా లేదని ముందునుండి చెబుతున్నామని జగన్ వర్గం ఎమ్మెల్యే శోభా నాగిరెడ్డి ఆదివారం అన్నారు. జగన్‌తో మధ్యాహ్నం భేటీ అనంతరం ఎమ్మెల్యేలు మీడియాతో మాట్లాడారు. జగన్ వర్గం ఎమ్మెల్యేలను ప్రభుత్వం ప్రలోభ పెట్టాలని చూస్తోందని ఆరోపించారు. భేటీకు అందరూ హాజరవుతున్నారా అనేది విషయం కాదన్నారు. పార్టీలో జరిపే సమావేశాలకు అందరు హాజరవుతున్నారా అలాగే ఇది కూడా అన్నారు. జగన్ ఎమ్మెల్యేలపై అంతా దుష్ప్రచారం జరుగుతోందన్నారు. ఏదైనా ఉంటే ధైర్యంగా ఎదుర్కోవాలని కాని తెరవెనుక కుట్రలు సరికాదన్నారు. తాను బయటకు వెళ్లినప్పుడే తనపై కుట్ర జరుగుతుందని జగన్‌కు తెలుసునన్నారు.

జగన్ వెంట ఉన్న ఎమ్మెల్యేలపై విపరీతమైన ఒత్తిడి ఉందన్నారు. ప్రతి సమావేశంలో మా బలం నిరూపించుకోవాల్సిన అవసరం లేదన్నారు. రేపు అవిశ్వాసం తీర్మానం సమయంలో బలం తెలిసిపోతుందన్నారు. అయితే తమ లక్ష్యం ప్రభుత్వాన్ని పడగొట్టడం కాదన్నారు. కాంగ్రెసు, టిడిపిలు పోటాపోటీగా జగన్‌పై కుట్రలు చేస్తున్నారని విమర్శించారు. రాజకీయ నేతలతో పాటు ఓ వర్గం మీడియా కూడా కట్టుకథలు అల్లడం శోచనీయమన్నారు. తమకు ఎన్ని ఇబ్బందులు ఉన్నా జగన్ వెంటే నడుస్తామని చెప్పారు.

Published On December 4, 2011