వైయస్ జగన్ వర్గం ఎమ్మెల్యేలపై అనర్హత వేటు

హైదరాబాద్: విప్‌ను ధిక్కరించినందుకు వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి చెందిన 17 మంది శాసనసభ్యులపై అనర్హత వేటు పడే అవకాశాలున్నట్లు వార్తలు వస్తున్నాయి. అవిశ్వాస తీర్మానానికి వ్యతిరేకంగా ఓటేయాలనే పార్టీల విప్‌లను కాంగ్రెసు, ప్రజారాజ్యం పార్టీల శాసనసభ్యులు ధిక్కరించారు. వీరిలో 16 మంది కాంగ్రెసు పార్టీకి చెందినవారు కాగా, ఒకరు ప్రజారాజ్యం పార్టీకి చెందినవారు. వారిపై స్పీకర్ నాదెండ్ల మనోహర్‌కు ఫిర్యాదు చేయాలని కాంగ్రెసు, ప్రజారాజ్యం పార్టీలు నిర్ణయించుకున్నట్లు సమాచారం. ఆ పార్టీల ఫిర్యాదును పరిగణనలోకి తీసుకుని అనర్హత వేటు వేస్తే ఆరు నెలల్లోగా ఉప ఎన్నికలు వస్తాయి. వైయస్ జగన్ వర్గంలోని తెలుగుదేశం పార్టీకి చెందిన బాలనాగిరెడ్డి అవిశ్వాస తీర్మానానికి అనుకూలంగా ఓటు వేశారు కాబట్టి విప్‌ను ధిక్కరించినట్లు కాదు.

ఇప్పటికే తెలంగాణలో ఏడు స్థానాలు ఖాళీ అయ్యాయి. జగన్ వర్గానికి చెందిన శాసనసభ్యుపలపై వేటు పడితే మొత్తం 24 శాసనసభా స్థానాలకు రాష్ట్రంలో ఉప ఎన్నికలు వస్తాయి. తాము ఉప ఎన్నికలకు సిద్ధంగా ఉన్నామని వైయస్సార్ కాంగ్రెసు పార్టీ నాయకులు చెప్పారు. కాంగ్రెసు పార్టీ కూడా ఉప ఎన్నికలకు సిద్ధం కావాలని నిర్ణయించుకున్నట్లు తెలుస్తోంది.

English summary

YSR Congress president YS Jagan camp MLAs may be disqualified.