ముగ్గురు మాజీ ముఖ్యమంత్రులపై లోకాయుక్త కేసు

By Srinivas

Published: Thursday, December 8, 2011, 17:50 [IST]

బెంగళూరు: అక్రమ మైనింగ్ కేసులో ముగ్గురు మాజీ ముఖ్యమంత్రులపై లోకాయుక్త పోలీసులు గురువారం ఎఫ్ఐఆర్ నమోదు చేశారు. మాజీ ముఖ్యమంత్రి, ప్రస్తుత విదేశాంగ మంత్రి ఎస్ఎం కృష్ణ, మాజీ ముఖ్యమంత్రులు ధరం సింగ్, కుమారస్వామిలపై కూడా పోలీసులు కేసు నమోదు చేశారు. ఐదు రోజుల క్రితం ఓ ప్రయివేటు ఫిర్యాదు మేరకు లోకాయుక్త అక్రమ మైనింగ్‌పై విచారణ జరిపింది. విచారణ అనంతరం పోలీసులు గురువారం 13బి, 468, 409, 420 క్రింద కేసు నమోదు చేసినట్లుగా తెలుస్తోంది. దీనిపై పూర్తి వివరాలు జనవరి 6 వరకు అందించాలని జడ్జి లోకాయుక్తకు సూచించారు.

కాగా వీరిపై కేసు నమోదు చేయడం ద్వారా ఇప్పటి వరకు కర్నాటకలో అక్రమ మైనింగ్ కేసులో బిజెపి, జెడి(ఎస్)తో పాటు కాంగ్రెసు కలిసినట్లయింది. ప్రముఖ సామాజిక సంస్కర్త అబ్రహం టి జోసెఫ్ వీరిపై లోకాయుక్తలో ఫిర్యాదు చేశారు. వివరాల ప్రకారం ఎస్ఎం కృష్ణ పాలన సమయంలో(1999-2004) గనుల కేటాయింపులు జరపడమే కాకుండా, పాత ధరల ప్రకారమే సంస్థలకు కట్టబెట్టారు. అంతేకాకుండా ఫారెస్టు లాండ్‌ను కట్టబెట్టారు. ధరం సింగ్ 2005-06 మధ్య కాలంలో ముఖ్యమంత్రిగా పని చేసిన కాలంలో ఐరన్ ఓర్ తాత్కాలిక ట్రాన్సుపోర్టుకు అనుమతులిచ్చారని ఆరోపించారు.

Published On December 8, 2011