జగన్ అవినీతిని సహించం, ఎమ్మెల్యేలపై ఫిర్యాదు: కొండ్రు

By Srinivas

Published: Sunday, December 11, 2011, 17:06 [IST]

శ్రీకాకుళం: తెలుగుదేశం ప్రవేశ పెట్టిన అవిశ్వాస తీర్మానంలో ప్రభుత్వానికి వ్యతిరేకంగా ఓటు వేసిన వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం పదహారు మంది శాసనసభ్యులను ప్రజలు క్షమించరని చీప్ విప్ కొండ్రు మురళి ఆదివారం అన్నారు. ఉప ఎన్నికల్లో వారికి పరాభవం తప్పదన్నారు. కాంగ్రెసు పార్టీ గుర్తుతో గెలిచి ఆ ప్రభుత్వానికే వ్యతిరేకంగా ఓటు వేయడం ద్వారా వారు తప్పు చేశారన్నారు. అలా ఓటు వేయడం అనైతికమని మండిపడ్డారు. జగన్ వర్గం కనీసం వార్డు మెంబరును కూడా గెలుచుకోలేదని ధ్వజమెత్తారు.

ఎమ్మెల్యేలు ప్రభుత్వానికి వ్యతిరేకంగా ఓటు వేయడాన్ని జగన్ సమర్థించుకోవడం సిగ్గుచేటన్నారు. దివంగత వైయస్ తనయుడు అయినంత మాత్రాన అతనిని గౌరవించాల్సిన అవసరం లేదని, అతని అవినీతిని కూడా సహించే ప్రసక్తి లేదన్నారు. ఇది ప్రజాస్వామ్యమని రాచరికం కాదని జగన్ గుర్తుంచుకోవాలన్నారు. జగన్ వర్గం ఎమ్మెల్యేలపై వేటు వేయాలంటూ ఒకటి రెండు రోజుల్లో స్పీకర్‌ను కలవనున్నట్లు చెప్పారు.

Published On December 11, 2011