చంద్రబాబు అవిశ్వాస ఉద్దేశ్యం అదే: శోభా నాగి రెడ్డి

By Srinivas

Published: Monday, December 12, 2011, 15:56 [IST]

కర్నూలు/హైదరాబాద్: కిరణ్ కుమార్ రెడ్డి ప్రభుత్వాన్ని మరో రెండేళ్లు కాపాడాలనే ఉద్దేశ్యంతోనే టిడిపి అధినేత నారా చంద్రబాబు నాయుడు అవిశ్వాస తీర్మానం పెట్టారని వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం ఎమ్మెల్యే శోభా నాగి రెడ్డి సోమవారం కర్నూలు జిల్లాలో అన్నారు. ఎన్నికలు ఎప్పుడు వచ్చినా ప్రజల్లోకి ధైర్యంగా వెళ్లేది కేవలం వైయస్సార్ కాంగ్రెసు మాత్రమేనన్నారు. రైతుల పేరు చెప్పి అవిశ్వాసం పెట్టిన బాబు సమస్యల గురించి కాకుండా దివంగత వైయస్‌ను తిట్టడానికి వేదికగా ఉపయోగించుకున్నారని ధ్వజమెత్తారు.

ఉప ఎన్నికల్లో కాంగ్రెసు పార్టీకి గుణపాఠం చెబుతామని మరో ఎమ్మెల్యే చెన్నకేశవ రెడ్డి వేరుగాఅన్నారు. తమపై వేటు వేయాలని కాంగ్రెసు నిర్ణయించుకుంటే స్వాగతిస్తామన్నారు. వేటు విషయంలో స్పీకర్ నిర్ణయానికి కట్టుబడి ఉంటామని చెప్పారు. ఉప ఎన్నికలు వస్తే మాత్రం వైయస్సార్ కాంగ్రెసు హవా ఖాయమన్నారు.

కాగా అంతకుముందు ప్రభుత్వ చీప్ విప్ కొండ్రు మురళీ మాట్లాడుతూ విప్ బేఖాతరు చేసిన జగన్ వర్గం ఎమ్మెల్యేలపై సాయంత్రంలోగా స్పీకర్‌కు ఫిర్యాదు చేస్తామని చెప్పారు. వేటుపై అందరితోనూ చర్చించామన్నారు. కొండ్రు స్పీకర్ నాదెండ్ల మనోహర్, సిఎం కిరణ్ కుమార్ రెడ్డితో భేటీ అయి అనర్హత పిటిషన్లపై చర్చించారు.

Published On December 12, 2011