కేసులు ఎత్తేస్తే పార్టీ రద్దుకు జగన్ రెడీ: చంద్రబాబు

By Pratap

Published: Saturday, December 17, 2011, 15:29 [IST]

హైదరాబాద్: కేసులు ఎత్తేస్తే పార్టీ రద్దు చేయడానికి వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి సిద్ధంగా ఉన్నారని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. కాంగ్రెసు పార్టీలో ఎప్పుడు కలుద్దామా అన్నట్లు తెలంగాణ రాష్ట్ర సమితి (తెరాస) నాయకులున్నారని ఆయన శనివారం ఓ కార్యక్రమంలో అన్నారు. వైయస్సార్ కాంగ్రెసు, కాంగ్రెసు, తెరాసలపై ఆయన విరుచుకుపడ్డారు. కాంగ్రెసు నాయకులు తెలుగు ప్రజల ఆత్మగౌరవాన్ని ఢిల్లీలో తాకట్టు పెడుతున్నారని ఆయన విమర్శించారు. కాంగ్రెసు ప్రభుత్వం పనిచేసే పరిస్థితి లేదని ఆయన అన్నారు.

ముఖ్యమంత్రి కిరణ్ కుమార్ రెడ్డి ఉద్యోగాలు ఊడబెరుతున్నారని, పైగా లక్ష ఉద్యోగాలు ఇస్తామంటూ ప్రగల్భాలు పలుకుతున్నారని ఆయన అన్నారు. తెరాస అధ్యక్షుడు కేంద్రంలో కార్మిక మంత్రిగా ఉన్నప్పుడే బీడీకట్టలపై పుర్రె గుర్తు వేసే పరిస్థితి వచ్చిందని ఆయన అన్నారు. కార్మికులకు సమస్యలు చాలానే ఉన్నాయని, పోరాడితే తప్ప సమస్యలు పరిష్కారం కావని ఆయన అన్నారు. వైయస్సార్ కాంగ్రెసు పార్టీ పూర్తిగా అవినీతిలో కూరుకుపోయిందని ఆయన విమర్శించారు. సామాజిక న్యాయం తెస్తానని ఓ హీరో వచ్చాడని, రెండేళ్లు కాకుండా కాంగ్రెసు కంపులో కలిసిపోయాడని ఆయన అన్నారు.

కాంగ్రెసు ప్రభుత్వాలు పనిచేసే పరిస్థితి లేదని ఆయన అన్నారు. ఏ ప్రభుత్వం ఎప్పుడు పడిపోతుందో వారికే తెలియదని ఆయన అన్నారు. కాంగ్రెసు పాలన వస్తే కరెంట్ తీగలు బట్టులు ఆరేసుకోవడానికి కూడా పనికి రావని, ఇప్పుడు అదే జరుగుతోందని ఆయన అన్నారు. కాంగ్రెసు ప్రభుత్వం సవ్యంగా పనిచేయడం లేదని ఆయన అన్నారు. తమ పార్టీని నాయకులే మోసం చేశారని, పార్టీ కార్యకర్తలు ఎప్పుడూ మోసం చేయలేదని ఆయన అన్నారు.

Published On December 17, 2011