దమ్ము చూపిస్తాం: సన్నాసి అంటూ కెసిఆర్‌పై టిడిపి ఫైర్

హైదరాబాద్: తెలంగాణ రాష్ట్ర సమితి అధ్యక్షుడు, కల్వకుంట్ల చంద్రశేఖర రావుపై తెలుగుదేశం పార్టీ సీనియర్ శాసనసభ్యులు మోత్కుపల్లి నర్సింహులు, ఎర్రబెల్లి దయాకర రావు మంగళవారం తీవ్రస్థాయిలో విరుచుకు పడ్డారు. తెలంగాణ విద్రోహ దినంపై టిఆర్ఎస్, జెఏసి స్పందించలేదని మండల కేంద్రాల్లో ఈ నెల 23న టిడిపి ఆధ్వర్యంలో కొవ్వత్తులతో నిరసన తెలుపుతామన్నారు. ఫోరం ఆధ్వర్యంలో గన్ పార్క్ వద్ద నిరసన తెలుపుతామన్నారు. ఉప ఎన్నికల్లో టిడిపి సత్తా చూపిస్తామన్నారు. టిఆర్ఎస్, కాంగ్రెసు పార్టీ ప్రజాప్రతినిధులు ఇప్పటికైనా రాజీనామా చేయాలని డిమాండ్ చేశారు. కాంగ్రెసుతో ఒప్పంధంలో భాగంగానే కెసిఆర్ సైలెంట్ అయ్యారని ధ్వజమెత్తారు. తెలంగాణ రాజకీయ ఐక్య కార్యాచరణ సమితి చైర్మన్ కోదండరామ్ టిడిపి పైకి ప్రజలను రెచ్చగొడితే రైతులు తరిమి తరిమి కొడతారన్నారు.

తెలంగాణవాదాన్ని వాడుకొని కెసిఆర్, కోదండరామ్ లబ్ధి పొందుతున్నారన్నారు. ప్రజలను పీడించిన నిజాం వారసుడు కెసిఆర్ అన్నారు. ఎన్నికలు, కలెక్షన్లే ఆయన అజెండా అని, పార్లమెంటు సమావేశాలు జరుగుతుంటే ఫామ్ హౌస్‌లో నిద్ర పోతున్నారని విమర్శించారు. తెలంగాణ ఆయన అయ్య జాగీరు కాదని, సెంటిమెంట్ అఢ్డు పెట్టుకొని ప్రజలను మోసం చేస్తున్నారని ధ్వజమెత్తారు. పోలవరం టెండర్ల అంశం ఎట్టి పరిస్థితుల్లో వదిలేది లేదన్నారు. టెండర్ల ఫైళ్లు స్పీకర్ ముందుకు వెళ్లాల్సిందేనని, ఎవరి ప్రమేయం ఉందో తేల్చాల్సిందేనన్నారు. కెసిఆర్‌కు గుణపాఠం చెబితే కానీ దారిలోకి రారని, రైతులు అల్లాడుతుంటే ఎక్కడ పడుకున్నారని ధ్వజమెత్తారు. అందర్నీ సన్నాసి అనే కెసిఆరే అసలు సన్నాసి అన్నారు.

ఉప ఎన్నికల్లో టిడిపి అన్ని స్థానాల్లో పోటీ చేస్తుందన్నారు. కాంగ్రెసు, టిఆర్ఎస్ తప్పుకుంటే మేం పోటీ నుండి తప్పుకుంటామన్నారు. ఉప ఎన్నికల్లో మా దమ్ము చూపిస్తామన్నారు. తెలంగాణపై మేథావులతో సదస్సు జరగాలని వారు అభిప్రాయపడ్డారు. కెసిఆర్‌కు జనాన్ని చంపుకు తినే అలావాటు ఉందన్నారు.

English summary

TDP MLAs Mothkupalli and Errabelli lashes out at TRS chief K Chandrasekhar Rao and JAC chairman Kodandaram.