మాకు హక్కు ఉంది: శోభా నాగిరెడ్డి ఫిర్యాదుపై చిరంజీవి

By Srinivas

Published: Tuesday, December 20, 2011, 14:16 [IST]

న్యూఢిల్లీ: ప్రజారాజ్యం పార్టీ తరఫున ఆళ్లగడ్డ నుండి గెలుపొందిన వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం ఎమ్మెల్యే శోభా నాగి రెడ్డిపై ఫిర్యాదు చేసే హక్కు తమకు ఉందని తిరుపతి శాసనసభ్యుడు చిరంజీవి మంగళవారం న్యూఢిల్లీలో అన్నారు. పిఆర్పీ సాంకేతికంగా ఇంకా కాంగ్రెసులో విలీనం కాలేదు కాబట్టి ఆమెను డిస్ క్వాలిఫై చేయమని అడిగే హక్కు ఉందన్నారు. అందుకే సభాపతికి ఫిర్యాదు చేశామన్నారు. నిర్ణయం ఆయనే తీసుకుంటారన్నారు. కాంగ్రెసు పార్టీ అధిష్టానంపై తమకు పూర్తి గౌరవం ఉందన్నారు. అధిష్టానం ఏ బాధ్యత ఇచ్చినా నిర్వహిస్తానని చెప్పారు.

మూడు ప్రాంతాలకు మూడు మంత్రి పదవులను తాము అధిష్టానం నుండి ఆశిస్తున్నట్లు చెప్పారు. ఇదే విషయాన్ని అధిష్టానం దృష్టికి తీసుకు వెళతామన్నారు. తాను పదవుల కోసం ఏనాడు పాకులాడలేదన్నారు. విదేశాలతో పోలిస్తే మన దేశంలో పరిశుభ్రత తక్కువ అని ఆయన ఓ కార్యక్రమంలో అన్నారు. మన వారిలో సివిక్ సెన్స్ పెంచితే పర్యాటక రంగాన్ని అభివృద్ధి చేయవచ్చునని అభిప్రాయపడ్డారు.

Published On December 20, 2011