స్పీకర్‌కు ఏం చెబుదాం!?: జగన్ వర్గం ఎమ్మెల్యేల భేటీ

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వర్గం శాసనసభ్యులు సోమవారం వైయస్సార్ కాంగ్రెసు పార్టీ కార్యాలయంలో భేటీ అయ్యారు. తెలుగుదేశం పార్టీ ప్రవేశ పెట్టిన అవిశ్వాస తీర్మానంలో పార్టీ విప్ ధిక్కరించి ప్రభుత్వానికి వ్యతిరేకంగా ఓటు వేయడంపై వారికి స్పీకర్ ఇటీవలె నోటీసులు ఇచ్చారు. దీనిపై 29వ తేదిలోగా సమాధానం ఇవ్వాలని ఆదేశించారు. దీంతో వారు స్పీకర్‌ను కలిసి ఏం చెప్పాలనే అంశంపై చర్చించేందుకు ఎమ్మెల్యేలు భేటీ అయ్యారు. ఏ నిర్ణయం తీసుకున్నా ఉమ్మడిగా ముందుకు వెళ్లాలనే యోచనలో వారు ఉన్నారు. తాము స్పీకర్ ముందే విప్ ధిక్కరించాం కాబట్టి తమపై వేటు వేసే అంశంపై వెంటనే నిర్ణయం తీసుకోవాలని వారు ఆయనను కోరే అవకాశముంది.

విప్ ధిక్కరించినట్లు స్పష్టంగా తెలుస్తున్నందున నోటీసులకు సమాధానం ఇవ్వాల్సిన అవసరం లేదని, అవసరమనుకుంటే వేటు వేయమని వారు స్పీకర్‌ను కోరేందుకే భేటీ అయినట్లుగా తెలుస్తోంది. అనర్హత పిటిషన్లను పెండింగులో పెట్టవద్దని వారు స్పీకర్‌ను కోరనున్నారు. ఈ నెల 29వ తేదిలోగా స్పీకర్ ముందు వారు హాజరై వివరణ ఇవ్వాల్సి ఉండగా అంతకుముందే ఆయనను కలిసి వివరణ ఇవ్వాల్సిన అవసరం లేదని చెప్పాలని అనుకుంటున్నట్లుగా తెలుస్తోంది. అయితే వారికి ఇప్పటి వరకు నాదెండ్ల పాయింట్‌మెంట్ దొరకలేదు. అసెంబ్లీ కార్యదర్శి సదారాంను కలిసి వారు ఇదే విషయాన్ని చెప్పే అవకాశముంది.

English summary

YSR Congress Party chief YS Jaganmohan Reddy camp MLAs will meet today to talk about speaker notices.