ముళ్లపెరియార్ డ్యాం: డిఎండికె చీఫ్ విజయకాంత్ అరెస్టు

By Srinivas

Published: Monday, December 26, 2011, 17:26 [IST]

చెన్నై: డిఎండికె అధినేత, ప్రముఖ సినీ హీరో విజయకాంత్‌ను చెన్నై పోలీసులు సోమవారం అరెస్టు చేశారు. ముళ్లపెరియార్ డ్యామ్ వివాదానికి నిరసనగా ప్రధాన మంత్రి మన్మోహన్ సింగ్ ఎదుట నిరసన నల్ల జెండాలతో ఆందోళన చేపట్టిన డిఎండికె అధినేత విజయకాంత్‌ను మరో వంద మందికి పైగా కార్యకర్తలను పోలీసులు అరెస్టు చేశారు. ముళ్లపెరియార్ డ్యాం విషయంలో కేంద్రం తీరుపై అసంతృప్తి వ్యక్తం చేసిన డిఎండికె నేతలు ప్రధాని కాన్వాయ్‌ను అడ్డుకోవాలని చూశారు. తమిళనాడుకు వ్యతిరేకంగా కేరళ ప్రభుత్వంతో ప్రధాని చేతులు కలిపారంటూ విమర్శించారు. నల్ల జెండాలతో ప్రధాని ఎదుట నిరసన తెలిపారు. ప్రధాని రాజ్ భవన్‌కు వెళ్లే దారిని పూర్తిగా బ్లాక్ చేశారు. దీంతో పోలీసులు వారిని అదుపులోకి తీసుకున్నారు.

మద్రాసు విశ్వవిద్యాలయంలో గణిత శాస్త్రవేత్త శ్రీనివాస రామానుజం 125వ జన్మదిన వేడుకల సందర్భంగా ఏర్పాటు చేసిన కార్యక్రమంలో పాల్గొనేందుకు ప్రధాని వెళుతుండగా వీరు అడ్డుకున్నారు. తమ నేత అరెస్టును నిరసిస్తూ డిఎండికె కార్యకర్తలు కామరాజర్ సలాయ్, సేలం జిల్లాల్లో ఆందోళనలు నిర్వహించారు. కాగా ఉదయం మాజీ ముఖ్యమంత్రి, డిఎంకె అధినేత కరుణానిధితో ప్రధాని భేటీ అయ్యారు. కరుణ ముళ్లపెరియార్ డ్యాం అంశాన్ని ప్రధాని దృష్టికి తీసుకు వెళ్లారు. ప్రధానికి ఓ మెమోరాండాన్ని సమర్పించారు.

Published On December 26, 2011