చంద్రబాబు మానుకోకుంటే వీపు విమానం మోత: నాగం

By Srinivas

Published: Thursday, December 29, 2011, 12:01 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు రైతు పోరుబాట యాత్ర పేరిట తెలంగాణపై రౌడీలతో దండయాత్రలు చేయడం మానుకోకపోతే ప్రజలు ఆయన వీపు విమానం మోత మోగిస్తారని తెలంగాణ నగారా సమితి అధ్యక్షుడు, నాగర్ కర్నూల్ మాజీ ఎమ్మెల్యే నాగం జనార్ధన్ రెడ్డి బుధవారం విమర్శించారు. తెలంగాణ కోసం ఆత్మ బలిదానాలు చేసిన కుటుంబాలు క్షోభపడే విధంగా చంద్రబాబు తన అనునయులతో మాట్లాడిస్తున్నారని ఆవేదన వ్యక్తం చేశారు. తెలంగాణలో ఇప్పటికే టిడిపి భూస్థాపితం అయిందని ఇప్పటికైనా నాటకాలు ఆపకపోతే ఆ పార్టీ నేతలకు పుట్టగతులుండవన్నారు. సీమాంధ్రలో సైలెంట్‌గా యాత్ర చేసిన బాబు తెలంగాణలో మాత్రం రౌడీలతో చేస్తున్నారన్నారు. బాబు యాత్రకు సిఎం వత్తాసు పలుకుతున్నారని, కిరణ్ పీఠం ఉప ఎన్నికల తర్వాత కదులుతుందన్నారు. ఉప ఎన్నికల్లో కాంగ్రెసు, టిడిపి ఒక్క సీటు గెలవదన్నారు.

తెలంగాణ విషయమై ఇద్దరు దళిత నాయకుల మధ్య కొట్లాట పెట్టి కెసిఆర్, చంద్రబాబు తమాషా చూస్తున్నారని సిపిఐ రాష్ట్ర కార్యదర్సి నారాయణ వేరుగా అన్నారు. మోత్కుపల్లి, చంద్రశేఖర్ మధ్య మాటల యుద్ధం పెట్టి ఒకాయన ఫాం హౌస్‌లో మరొకాయన జూబ్లీహిల్స్‌లో కూర్చున్నారన్నారు. మద్యం సిండికేట్లలో మంత్రులకు వాటాలు ఉన్నాయని ఆయన ఆరోపించారు. విద్యుత్ ఛార్జీల పెంపు ప్రతిపాదనను ఉపసంహరించుకోకుంటే వామపక్షాలు మరోసారి ప్రత్యక్ష కార్యాచరణకు దిగుతాయని హెచ్చరించారు.

Published On December 29, 2011