బాలకృష్ణ రాజకీయ ఆరంగేట్రంపై పురంధేశ్వరి కామెంట్

By Srinivas

Published: Sunday, January 15, 2012, 17:01 [IST]

విజయవాడ: కేంద్ర సహాయ మంత్రి, దివంగత తెలుగుదేశం పార్టీ వ్యవస్థాపక అధ్యక్షులు నందమూరి తారక రామారావు కుమార్తె దగ్గుపాటి పురంధేశ్వరి తన సోదరుడు, హీరో నందమూరి బాలకృష్ణ రాజకీయ ఆరంగేట్రంపై ఆదివారం స్పందించారు. బాలయ్య రాజకీయాల్లోకి వస్తానని చెప్పడం అది ఆయన వ్యక్తిగత విషయమని అన్నారు. ఓ కార్యక్రమంలో పాల్గొనేందుకు ఇక్కడకు వచ్చిన ఆమె ఈ వ్యాఖ్యలు చేశారు. అనంతరం గుంటూరు జిల్లాలోని దుగ్గిరాల జిల్లా పరిషత్ ఉన్నత పాఠశాల ముగింపు వేడుకల్లో ఆమె పాల్గొన్నారు. విద్యాభివృద్ధికి కేంద్ర, రాష్ట్ర ప్రభుత్వాలు అధిక ప్రాధాన్యం ఇస్తున్నాయని చెప్పారు. పాఠశాలల అభివృద్ధికి మానవ వనరుల శాఖ నుండి రూ.వంద కోట్లు మంజూరు చేయనున్నట్లు తెలిపారు. దేశంలోని ఏడువందల ఆదర్శ పాఠశాలల్లో రాష్ట్రానికి మూడు వందల యాభై మంజూరు చేసినట్లు చెప్పారు.

కాగా ఇటీవల కృష్ణా జిల్లాలో పర్యటించిన బాలకృష్ణ తాను క్రియాశీలక రాజకీయాల్లోకి వస్తానని చెప్పిన విషయం తెలిసిందే. 2014 ఎన్నికల్లో పార్టీ ఆదేశిస్తే ఏ ప్రాంతం నుండి పోటీ చేసేందుకైనా సిద్ధమని ప్రకటించారు. తెలంగాణ ప్రాంతం నుండి పోటీకి కూడా సై అన్నారు. బాలయ్య ఆరంగేట్రంపై ఆయన సోదరుడు హరికృష్ణ కూడా ఇంతకుముందే స్పందించారు. బాలయ్య పోటీ చేస్తే తాను ప్రచారం చేసి గెలిపిస్తానని చెప్పారు. కారణమేదైనా బాలయ్య రాజకీయ ఎంట్రీని ఆయన కుటుంబ సభ్యులు అందరూ దాదాపు స్వాగతిస్తున్నట్లుగానే కనిపిస్తోంది. బాలయ్య కూడా రాజకీయాల్లోకి సాధ్యమైనంత త్వరగా రావాలనే ఉత్సాహంలో ఉన్నారు.

Published On January 15, 2012