గుంటూరు ఓదార్పులో వైయస్ జగన్‌పై కోడిగుడ్ల దాడి

By Srinivas

Published: Thursday, January 19, 2012, 8:31 [IST]

గుంటూరు: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై బుధవారం రాత్రి కోడిగుడ్ల దాడి జరిగింది. గుంటూరు జిల్లాలో జగన్ రెండో విడద ఓదార్పు యాత్ర నిర్వహిస్తున్న విషయం తెలిసిందే. క్రోసూరు మండలం బయ్యవరం గ్రామంలో మీదుగా జగన్ వెళుతున్న సమయంలో గుర్తు తెలియని వ్యక్తులు ఆయన కాన్వాయ్‌పై గుడ్లతో దాడి చేశారు. మూడు గుడ్లు విసరగా ఒకటి జగన్ ముఖానికి, మరొకటి ఆయన వీపుకు తగిలినట్లుగా తెలిసింది. దీంతో గ్రామంలో ఉద్రిక్త పరిస్థితులు ఏర్పడ్డాయి. సుమారు రెండు గంటల పాటు ఉద్రిక్తత నెలకొంది. గ్రామంలోని ఎస్సీ కాలనీలో దివంగత ముఖ్యమంత్రి వైయస్ రాజశేఖర రెడ్డి విగ్రహావిష్కరణకు వెళుతుండగా ఈ ఘటన చోటు చేసుకుంది.

వెంటనే స్పందించిన ఆయన భద్రతా సిబ్బంది ఘటనకు బాధ్యులైన వారిని అదుపులోకి తీసుకున్నారు. దీంతో పరిస్థితి ఉద్రిక్తంగా మారిపోయింది. ఈ క్రమంలో పోలీసులు లాఠీఛార్జ్ చేశారు. పోలీసులు వ్యవహరించిన తీరుపట్ల గ్రామస్థులు ఆగ్రహం వ్యక్తం చేశారు. జగన్‌కు వ్యతిరేకంగా నినాదాలు చేశారు. మా ఊరికి వచ్చి మాపైనే దాడి చేస్తారా అంటూ భద్రతా సిబ్బందిపై మండిపడ్డారు. జగన్ కాన్వాయ్‌లోని ఒక అద్దం పగులగొట్టారు. పోలీసులు రంగంలోకి దిగి వారిని చెదరగొట్టడంతో జగన్ పర్యటన కొనసాగింది.

Published On January 19, 2012