డికె అరుణకు తెలంగాణ సెగ, కాన్వాయ్‌పై గుడ్లు చెప్పు

By Srinivas

Published: Thursday, January 19, 2012, 9:14 [IST]

మహబూబ్ నగర్: సమాచార శాఖ మంత్రి డికె అరుణకు బుధవారం తెలంగాణ సెగ తగిలింది. ఆమె మహబూబ్ నగర్ జిల్లాలోని కొల్లాపూర్ మండలం సింగపట్నం గ్రామంలో బుధవారం పర్యటించారు. ఇందులో భాగంగా స్థానిక లక్ష్మీ నరసింహ స్వామి బ్రహ్మోత్సవాల్లో పాల్గొన్నారు. స్వామి వారి రథోత్సవానికి ఆమె హాజరయ్యారు. ఆమె కాన్వాయ్ రథం దగ్గరకు రాగానే కొందరు తెలంగాణవాదులు కోడిగుడ్లు, రాళ్లు, చెప్పులు విసిరారు. పెద్దపెట్టున జై తెలంగాణ అని నినాదాలు చేశారు. వెంటనే రాజీనామా చేయాలని డిమాండ్ చేశారు. నిరసనలు, నినాదాల మధ్యనే డికె అరుణ రథానికి పూజలు నిర్వహించారు. పరిస్థితి ఉద్రిక్తంగా ఉండటంతో రథోత్సవం ప్రారంభం కాకముందే డికె అరుణ వెనుదిరిగారు.

ఈ సందర్భంగా మంత్రి డికె అరుణ విలేకరులపై కొంత అసహనం వ్యక్తం చేశారు. మీరు కెమెరాలు తిప్పుతున్నందువల్లే తెలంగాణవాదులు రెచ్చిపోయారని అసహనం వ్యక్తం చేశారు. రథోత్సవానికి మాజీ మంత్రి చిన్నా రెడ్డి, మాజీ ఎమ్మెల్యే మధుసూదన్ రావు హాజరయ్యారు.

Published On January 19, 2012