కెసిఆర్ తర్వాత తెలంగాణ భవన్ అమ్మేస్తాడు: ఎర్రబెల్లి

By Srinivas

Published: Sunday, January 22, 2012, 16:59 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు ఆదివారం మండిపడ్డారు. పత్రిక పేరుతో తెలంగాణలో వందల కోట్ల రూపాయలు వసూలు చేసి నమస్తే తెలంగాణ పత్రిక పెట్టిన కెసిఆర్ ఆ తర్వాత ఆ పత్రికను అమ్ముకున్నారని ఏదో ఒకరోజు తెలంగాణ భవన్ కూడా అమ్మి వేయడం ఖాయమని విమర్శించారు. కెసిఆర్ మరో చెన్నారెడ్డిలా ప్రవర్తిస్తున్నారని ధ్వజమెత్తారు. తెలంగాణ ఉద్యమాన్ని అమ్ముకున్నారన్నారు. ఇప్పటికైనా తెలంగాణ ప్రజలు కెసిఆర్ వైఖరిని అర్థం చేసుకోవాలని విజ్ఞప్తి చేశారు. తెలంగాణ రాష్ట్ర సాధన విషయంలో కెసిఆర్‌కు చిత్తశుద్ధి లేదన్నారు. తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ కెసిఆర్ వైఖరిని ఎందుకు ప్రశ్నించరన్నారు. తమ పార్టీ అధినేత నారా చంద్రబాబు నాయుడిని తెలంగాణ వ్యతిరేకిగా ముద్రవేసి అడ్డుకున్న కోదండరామ్ తమ మద్దతు కోసం మళ్లీ పార్టీ కార్యాలయానికి ఎందుకొచ్చారన్నారు.

కెసిఆర్ ఉద్యమాన్ని తీవ్ర రూపంలోకి తీసుకు వెళ్లి ఆ తర్వాత రిటైల్‌గా అమ్ముతున్నారన్నారు. ఉప ఎన్నికలలో లబ్ధి పొందేందుకే జెఏసితో ఉద్యమింప చేయిస్తున్నారన్నారు. కెసిఆర్ నక్కలా ఉండి కుక్క తోలు కప్పుకున్నారన్నారు. కెసిఆర్, కోదండరాంలను జెఏసి నుండి బహిష్కరించాలని డిమాండ్ చేశారు. టిడిపి తెలంగాణ ఫోరం తెలంగాణ కోసం ఎలాంటి త్యాగాలకైనా సిద్ధమన్నారు.

Published On January 22, 2012