చంద్రబాబు వ్యూహం: బాలయ్యపై ఇప్పటికే నిర్ణయం?

హైదరాబాద్: తాను వచ్చే ఎన్నికల్లో పోటీ చేస్తానని కృష్ణా జిల్లాలో ప్రకటించినప్పటి నుండి హీరో నందమూరి బాలకృష్ణ రాష్ట్రంలో వరుస రాజకీయ పర్యటనలు చేస్తున్నారు. ఆయన రాజకీయ ఆరంగేట్ర ప్రకటన ఇటు తెలుగుదేశం పార్టీలో, అటు అభిమానుల్లోనూ కొత్త ఉత్సాహం తీసుకు వచ్చింది. బాలయ్య రాజకీయ ఆరంగేట్ర ప్రకటన కేవలం ఆయన నిర్ణయమే కాదని, అంతేకాకుండా ఆషామాషీగా చేసింది కాదనే వాదనలు వినిపిస్తున్నాయి. తెలుగుదేశం పార్టీ అధినేత నారా చంద్రబాబు నాయుడు, బాలయ్యలు కలిసి ముందే ప్రణాళిక చేసుకొని ఉండవచ్చునని, ఆ మేరకే ఆయన రాజకీయ రాజధాని అయిన విజయవాడలో ప్రకటించి ఉంటారనే అభిప్రాయాలు వినవస్తున్నాయి. రెండు పర్యాయాలు వరుసగా పార్టీ అధికారంలోకి రాకపోయేసరికి కార్యకర్తల్లో మరింత నిస్తేజం రాకుండా చూసేందుకే బాబు మాస్ ఇమేజ్ కలిగిన బాలయ్యను తెరపైకి తీసుకు వచ్చి ఉండవచ్చునని అంటున్నారు.

మరోవైపు సీమాంధ్రలో వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి వల్ల, తెలంగాణలో ఉద్యమం వల్ల పార్టీ కొంత ఒడిదుడుకులను ఎదుర్కొంటోంది. ఈ నేపథ్యంలో కార్యకర్తల్లో జోష్ నింపేందుకే ఇప్పటికిప్పుడు బాలయ్యను తెరపైకి తీసుకు వచ్చారని అంటున్నారు. పార్లమెంటు స్థానానికి పోటీ చేస్తే పార్టీకి ఎంతో లబ్ధి చేకూరుతుందని పార్టీ నేతలు అభిప్రాయపడుతున్నా, పార్టీ ఆదేశిస్తే ఉప ఎన్నికల్లో పోటీకి సిద్ధమని బాలయ్య అంటున్నా, బాలయ్య ఇప్పుడు పోటీ చేయరని చంద్రబాబు చెబుతున్నా... బాబు, బాలయ్యల మధ్య మాత్రం ఎక్కడి నుండి, ఎప్పుడు పోటీ అనే అంశంపై నిర్ణయం దాదాపు జరిగిపోయి ఉంటుందని అభిప్రాయపడుతున్నారు. పార్టీలో ఉత్సాహం నింపడానికి, మరోవైపు కాంగ్రెసులో విలీనం అయిన చిరంజీవి మాస్ ఇమేజ్‌ను ధీటుగా ఎదుర్కొన గల సత్తా బాలయ్యకే ఉండటం వల్లనే ఆయనను వ్యూహాత్మకంగా రంగంలోకి బాబు దింపారనే వాదనలు వినిపిస్తున్నాయి.

English summary

It seems, Balakrishna political entry with TDP chief Nara Chandrababu Naidu instructions.