చల్లాల్సిన బురద చల్లాక: సిబిఐ జెడిపై జగన్ పార్టీ నేత

By Pratap

Published: Tuesday, January 31, 2012, 17:06 [IST]

హైదరాబాద్: తమ పార్టీ అధ్యక్షుడు వైయస్ జగన్మోహన్ రెడ్డిపైనా తమ పార్టీ నేతలపైనా కొన్ని పత్రికలు కావలినంత బురద చల్లిన తర్వాత సిబిఐ జెడి లక్ష్మీనారాయణ ఖండించడమేమిటని వైయస్సార్ కాగ్రెసు పార్టీ అధికార ప్రతినిధి వాసిరెడ్డి పద్మ ప్రశ్నించారు. లక్ష్మీనారాయణ తీరుపై ఆమె మంగళవారం మీడియా ప్రతినిధుల సమావేశంలో తీవ్రంగా ధ్వజమెత్తారు. కొన్ని పత్రికలు సిబిఐ కథనాల పేరుతో గతంలో వార్తలు ప్రచురించినప్పుడు లక్ష్మీనారాయణ ఎందుకు స్పందించలేదని ఆమె ప్రశ్నించారు. ఇప్పుడు స్పందించడం వెనక తమకు అనుమానాలు కలుగుతున్నాయని ఆమె అన్నారు. సిబిఐకి దురుద్దేశాలు ఉన్నాయని ఆమె అన్నారు.

లక్ష్మీనారాయణ నిజాయితీ నిరూపించుకోవాల్సిన అవసరం ఉందని, నార్కో టెస్టులు జరపాల్సింది లక్ష్మినారాయణకేనని, అందుకు సమయం ఇదేనని ఆమె అన్నారు. సిబిఐ జెడి లక్ష్మీనారాయణ చాలా అమాయకంగా మాట్లాడుతున్నారని, నటులు లక్ష్మీనారాయణకు సాటి రారని ఆమె వ్యాఖ్యానించారు. ఎల్లో మీడియా అంతా రాసిన తర్వాత లక్ష్మీనారాయణ ఇప్పుడు మాట్లాడుతున్నారని ఆమె అన్నారు. సిబిఐ లీకు వీరులకు పద్మ అవార్డులు ఇవ్వాలని ఆమె వ్యాఖ్యానించారు.

Published On January 31, 2012