ఎవరినీ టార్గెట్ చేయలేదు, కల్పిత వార్తలొద్దు: సిబిఐ జెడి

By Srinivas

Published: Tuesday, January 31, 2012, 13:31 [IST]

హైదరాబాద్: మీడియా ఊహాజనిత కథనాలు ప్రసారం చేయవద్దని సిబిఐ జాయింట్ డైరెక్టర్ లక్ష్మీ నారాయణ మంగళవారం సూచించారు. ఆయన ఉదయం ప్రభుత్వం ప్రధాన కార్యదర్శి పంకజ్ ద్వివేదితో సమావేశమయ్యారు. అనంతరం మీడియాతో మాట్లాడారు. ఎమ్మార్ కేసులో సోమవారం అరెస్టు చేసిన బిపి ఆచార్య సమాచారం ఇచ్చేందుకే సిఎస్‌ను కలిశానని చెప్పారు. మీడియా ఊహాజనిత వార్తలకు దూరంగా ఉండాలన్నారు. అవసరాన్ని బట్టి మేమే సమాచారం విడుదల చేస్తామని చెప్పారు. కల్పిత వార్తలపై పిఐబికి లేఖ రాశామన్నారు. సిబిఐ పేరుతో రాయడం సమంజసం కాదన్నారు. నిజంగా ఏం జరుగుతుందో ప్రజలకు తెలియాలన్నారు. తాము ఎవ్వరినీ ఉద్దేశ్య పూర్వకంగా అరెస్టు చేయలేదని స్పష్టం చేశారు. అందరినీ విచారణ కోసమే అరెస్టు చేశామన్నారు. ఆయా కేసుల్లో ఎవరి ప్రమేయముందని తెలిసినా విచారిస్తున్నామని చెప్పారు.

నిందితులపై తాము థర్డ్ డిగ్రీ ప్రయోగించామన్న వార్తలు అవాస్తవమన్నారు. తాము ఏ ఒక్కరినీ లక్ష్యంగా చేసుకొని విచారణ జరపడం లేదన్నారు. అలాంటి ఆలోచన తమకు ఏమాత్రం లేదని అభిప్రాయపడ్డారు. అందరూ సంయమనం పాటించాలన్నారు. సిఎస్‌తో కేసుల పురోగతిపై కూడా చర్చించామన్నారు. శ్రీలక్ష్మి పేరును ఛార్జీషీట్‌లో చేర్చే అంశంపై కేంద్రానికి లేఖ రాసినట్లు చెప్పారు. ఎమ్మార్ విల్లాలపై నిర్ణయం తీసుకోవాల్సింది ప్రభుత్వమేనన్నారు. విచారణ కోసం ప్రభుత్వం తరఫున మేం సహకారం కోరుతున్నామన్నారు.

Published On January 31, 2012