సిబిఐ దర్యాప్తు: నేతల తలరాతలు మారుతాయా?

By Pratap

Published: Wednesday, February 1, 2012, 19:44 [IST]

హైదరాబాద్: మూడు కేసుల్లోనూ సిబిఐ దర్యాప్తు వేగవంతమైన సూచనలు కనిపిస్తున్నాయి. ఎమ్మార్ కుంభకోణం కేసు, వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసు, కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసు రాష్ట్రానికి చెందిన తల రాతలు మారుస్తాయా అనే చర్చ సాగుతోంది. జగతి పబ్లికేషన్స్ వైయస్ చైర్మన్ విజయసాయి రెడ్డి అరెస్టు మినహా వైయస్ జగన్ ఆస్తుల కేసులో పైకి ఏ విధమైన పరిణామాలు కనిపించడం లేదు. కానీ ఎమ్మార్ కుంభకోణం, గాలి జనార్దన్ రెడ్డి కేసుల్లో అరెస్టులు జరిగాయి. కోర్టులో సిబిఐ చార్జిషీట్ దాఖలు చేసింది. అరెస్టయివారిలో ఐఎఎస్ అధికారులు, ఇతరులు ఉన్నారు తప్ప రాష్టానికి చెందిన నాయకులు ఎవరూ లేరు. రాజకీయ నాయకుల అరెస్టులు కూడా జరగవచ్చునని ఊహాగానాలు చెలరేగుతున్నాయి. చెప్పాలంటే, అందరి దృష్టి కూడా వైయస్ జగన్మోహన్ రెడ్డిపైనే ఉంది. గాలి జనార్దన్ రెడ్డి కర్ణాటకకు చెందిన రాజకీయ నాయకుడు.

వైయస్ జగన్ నాయకత్వంలోని వైయస్సార్ కాంగ్రెసు పార్టీ నాయకులు ప్రతి రోజూ సిబిఐ దర్యాప్తు తీరును తప్పు పడుతూ విమర్శల జడివాన కురిపిస్తున్నారు. వైయస్ జగన్‌ను, తమ పార్టీని లక్ష్యంగా చేసుకుని సిబిఐ దర్యాప్తు కొనసాగుతోందని విమర్శిస్తున్నారు. సిబిఐ దర్యాప్తు కుట్రపూరితంగా సాగుతోందని విమర్శిస్తున్నారు. ఎమ్మార్ ప్రాపర్టీస్ కుంభకోణం కేసు వారిని ఎక్కువగా కలవరపెడుతున్న సూచనలు కనిపిస్తున్నాయి. వైయస్ జగన్‌కు సన్నిహితుడిగా భావిస్తున్న సునీల్ రెడ్డి అరెస్టు తర్వాత వైయస్సార్ కాంగ్రెసు నాయకులు సిబిఐ దర్యాప్తుపై ప్రతి రోజూ విరుచుకుపడుతున్నారు.

తెలుగుదేశం పార్టీ అధ్యక్షుడు నారా చంద్రబాబు నాయుడిపై వైయస్సార్ కాంగ్రెసు గౌరవాధ్యక్షురాలు వైయస్ విజయమ్మ వేసిన పిటిషన్‌పై హైకోర్టు ఆదేశించిన ప్రాథమిక విచారణ ఆగిపోయింది. ఆ వ్యవహారం ఇంకా కోర్టులో నలుగుతోంది. ఎమ్మార్, వైయస్ జగన్ ఆస్తులు, అక్రమ మైనింగ్ కేసులపై జరుగుతున్న సిబిఐ విచారణ పరిణామాలు చంద్రబాబుకు ఆనందం కలిగిస్తున్న సూచనలు కనిపిస్తున్నాయి. తెలుగుదేశం పార్టీ నాయకులు మాట్లాడుతున్న తీరు ఈ విషయాన్ని పట్టిస్తోంది. కాంగ్రెసు నాయకులు మాత్రం, కొద్ది మంది తప్ప, పెద్దగా ఎవరూ మాట్లాడడం లేదు. సిబిఐ దర్యాప్తు వ్యవహారాలు వైయస్ జగన్‌కు మైనస్‌గా మారి, చంద్రబాబుగా ప్లస్ అవుతుందా చర్చ సాగుతోంది. ఆ విషయాన్ని ఇప్పుడే తేల్చే పరిస్థితి లేదు.

Published On February 1, 2012