నోటిని అదుపులో పెట్టుకో:కెసిఆర్‌కు పొంగులేటి హెచ్చరిక

By Srinivas

Published: Friday, February 3, 2012, 15:44 [IST]

హైదరాబాద్: సిపిఐ రాష్ట్ర కార్యదర్శి నారాయణ, సిపిఎం రాష్ట్ర కార్యదర్శి బివి రాఘవులు, తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై కాంగ్రెసు పార్టీ ఎమ్మెల్సీ పొంగులేటి సుధాకర రెడ్డి శుక్రవారం మండిపడ్డారు. కమ్యూనిస్టు పార్టీలో ఎప్పుడు ఏ పార్టీతో పొత్తు పెట్టుకుంటాయో తెలియదన్నారు. కాంగ్రెసును విమర్శించే అర్హత వారికి లేదన్నారు. బివి రాఘవులు టివి రాఘవులుగా, నారాయణ కోడి నారాయణగా మారి పోయారని విమర్శించారు. మీడియాను ఆకర్షించేందుకే కమ్యూనిస్టు నేతలు కాంగ్రెసుపై విమర్శలు చేస్తున్నారన్నారు. ఆ పార్టీలు కమర్షియల్ పార్టీ ఆఫ్ ఇండియాగా మారి పోయాయని ఎద్దేవా చేశారు. అవి ఇప్పుడు దయానీయస్థితిలో కొట్టుమిట్టాడుతున్నాయన్నారు. జనతా పార్టీ అధ్యక్షుడు సుబ్రహ్మణ్య స్వామికి తమ అధినేత్రి సోనియా గాంధీని విమర్శించే అర్హత లేదన్నారు.

టిఆర్ఎస్ నేత కెసిఆర్ తెలంగాణ అంశం పక్కన పెట్టారని ధ్వజమెత్తారు. ముఖ్యమంత్రి కిరణ్ కుమార్ రెడ్డికి పిచ్చి పట్టిందంటున్న కెసిఆర్‌కే పిచ్చి పట్టిందన్నారు. ఆయన దౌర్భాగ్యం వల్లనే తెలంగాణ ఉద్యమం ఈ పరిస్థితికి వచ్చిందన్నారు. ఆయన నోటిని అదుపులో పెట్టుకోవాలని హెచ్చరించారు. లేదంటే ప్రజలు తగిన బుద్ధి చెబుతారన్నారు. తెలంగాణ ప్రజల నుండి తప్పించుకు తిరుగుతున్న కెసిఆర్‌కు కిరణ్ రెడ్డిని విమర్శించే నైతిక హక్కు లేదని మరో ఎమ్మెల్యే తూర్పు జయ ప్రకాశ్ రెడ్డి వేరుగా విమర్శించారు. ఇచ్చిన హామీ మేరకు లక్షకు పైగా యువతకు ఉద్యోగాలు ఇచ్చారన్నారు. తెలంగాణపై ఉన్న చిత్తశుద్ధితో 14ఎఫ్ రద్దు చేసేందుకు సిఎం కృషి చేశారన్నారు. జూడాల అంశాన్ని కెసిఆర్ రాజకీయం చేయాలని చూస్తున్నారని అన్నారు. ఆయనపై తెలంగాణ ప్రజలకు నమ్మకం పోయిందని, ఆయన ఎలాంటి కార్యాచరణకు సిద్ధపడినా ప్రజలు నమ్మే పరిస్థితి లేదన్నారు.

Published On February 3, 2012