మాజీ భార్య అశ్లీల ఫొటోల కేసులో టెక్కీకి ఏడాది జైలు

హైదరాబాద్: తన మాజీ భార్య ప్రతిష్టను దెబ్బ తీసిన కేసులో ఓ వ్యక్తికి ఏడాది జైలు శిక్ష పడింది. సమాచారా సాంకేతిక చట్టం అమలులోకి వచ్చిన తర్వాత ఓ సైబర్ నేరంలో నిందితుడికి శిక్ష పడిన మొదటి కేసు ఇదే. తన మాజీ భార్యకు చెందిన అభ్యంతరకరమైన ఫొటోలను ఇంటర్నెట్‌లో పోస్టు చేసిన ఓ కంప్యూటర్ ఇన్‌స్ట్రక్టర్‌కి హైదరాబాదులోని నాంపల్లి ఆరో అదనపు చీఫ్ మెట్రోపాలిటన్ మెజిస్ట్రేట్ గురువారం ఏడాది జైలు శిక్ష విధించారు. హైదరాబాదులోని కిల్వత్‌కు చెందిన సనుల్లా ఫైజల్ (30) 2003లో తన భార్యతో విడాకులు తీసుకున్నాడని, ఆ తర్వాత ఆమె నగ్న ఛాయాచిత్రాలను వివిధ సైట్లలో పోస్టు చేస్తూ వచ్చాడని నేర పరిశోధన విభాగం సైబర్ సెల్ అధికారులు చెప్పారు.

బాధితురాలు 2004లో సిఐడికి ఫిర్యాదు చేసింది. ఆ సాఫ్ట్‌వేర్ ఇంటిపై పోలీసులు దాడి చేసి కెమెరా, కంప్యూటర్ స్వాధీనం చేసుకున్నాైరు. అతనే ఆమె ఫొటోలను అప్‌లోడ్ చేసినట్లు ఫోరెన్సిక్ పరీక్షల్లో తేలిందని సైబర్ క్రైమ్ పోలీసు అదనపు సూపరింటిండెంట్ యు. రామ్మోహన్ చెప్పారు. ఫైజల్ ఆమె ఫొటోలను అప్‌లోడ్ చేయడమే కాకుండా అశ్లీలమైన వ్యాఖ్యలు రాస్తూ వచ్చాడని చెప్పారు. ఆమె కుటుంబ సభ్యులకు కూడా అసభ్యకరమైన ఇ- మెయిల్స్ పంపుతూ వచ్చినట్లు చెప్పారు. బాధితురాలికి 12 వేల రూపాయలు చెల్లించాలని కూడా మెజిస్ట్రేట్ ఫైజల్‌ను ఆదేశించారు.

English summary

A computer instructor, who reportedly posted objectionable images of his former wife on the internet, was awarded one-year imprisonment by the VIth additional chief metropolitan magistrate, Nampally court, on Thursday.