వైయస్ఆర్‌కు గుడి, జగన్ చేతుల మీదుగా విగ్రహ ప్రతిష్ట

విశాఖపట్నం: దివంగత ముఖ్యమంత్రి వైయస్ రాజశేఖర రెడ్డికి అభిమానులు గుడి కట్టనున్నారు. సాధారణంగా దేవుళ్లకు గుళ్లు కడతారు. ఇటీవలి కాలంలో అభిమానం మితిమీరి సినీ తారలకు కూడా గుళ్లు కట్టిన సందర్భాలు ఉన్నాయి. తమిళనాడులో అభిమాన నటీనటులకు గుళ్లు కట్టిన సందర్భాలు ఉన్నాయి. తాజాగా మన రాష్ట్రంలో వైయస్‌కు విశాఖపట్నం అభిమానులు గుడి కట్టబోతున్నారు. జిల్లాకు చెందిన పాయకరావు మండలం రాజగోపాలపురం గ్రామంలో వైయస్ అభిమానులు గుడి నిర్మించేందుకు సిద్ధమయ్యారు. ఆలయ నిర్మాణం ఇంకా పూర్తి కాలేదు. అయితే ఓ ప్రైవేటు కార్యక్రమం కోసం వైయస్సార్ కాంగ్రెసు పార్టీ అధినేత వైయస్ జగన్మోహన్ రెడ్డి శనివారం విశాఖ వస్తున్నారు. దీంతో ఆలయ నిర్మాణం పూర్తి కానప్పటికీ వైయస్సార్ విగ్రహాన్ని ఉంచి ప్రతిష్ట కార్యక్రమం నిర్వహించేందుకు ఏర్పాట్లు చేస్తున్నారు.

కాగా జగన్ దాదాపు తొమ్మిది నెలల తర్వాత విశాఖ వస్తున్నారు. గత ఏడాది మే 31న విజయనగరం జిల్లాలో ఓదార్పు యాత్ర చేపట్టిన జగన్ తిరుగు ప్రయాణంలో అనకాపల్లి ఎంపీ సబ్బం హరి ఇంట్లో బస చేశారు. ఆ మర్నాడు విశాఖ నుండి హైదరాబాద్ వెళ్లారు. అయితే తాజాగా నర్సీపట్నం ఎమ్మెల్యే బోళెం ముత్యాలపాప కుమార్తె, నరసన్నపేట ఎమ్మెల్యే ధర్మాన కృష్ణదాసు కుమారుడి వివాహానికి ఆయన హాజరు కానున్నారు. ఈ సందర్భంగా ఆయన వైయస్సార్ ఆలయ ప్రతిష్టా కార్యక్రమంలో పాల్గొననున్నారు.

English summary

Rajagopalapuram of Vishakapatnam villagers ready to build a temple to late YS Rajasekhar Reddy.