ప్రధాని నివాసం ఇంటికి అతి సమీపంలో పేలుడు

న్యూఢిల్లీ: ప్రధాని డాక్టర్ మన్మోహన్ సింగ్ నివాసానికి అతి సమీపంలో సోమవారం సాయంత్రం పేలుడు సంభవించింది. ఈ పేలుడులో నలుగురు గాయపడ్డారు. ప్రధాని నివాసానికి 500 మీటర్ల దూరంలో ఈ పేలుడు సంభవించడంతో తీవ్ర కలకలం చెలరేగింది. ఇజ్రాయెల్ దౌత్యవేత్త కారును పేలుడు తాకింది. ఇజ్రాయెల్ ఎంబసీ కార్యాలయం ప్రధాని నివాసానికి సమీపంలో ఉంది. కేంద్ర మంత్రి ముకుల్ వాస్నిక్ ఇల్లు కూడా ఈ పేలుడు సంభవించిన స్థలానికి అతి సమీపంలో ఉంది.

పేలుడు గల కారణమేమిటనేది తెలియడం లేదు. పేలుడు సంభవించిన కారు ఎంబసీ కార్యలయానికి సమీపంలో ఉందని ఇజ్రాయెల్ ఎంబసీ అధికార ప్రతినిధి డేవిడ్ గోల్డ్‌ఫార్బ్ చెప్పారు. పేలుడు సోమవారం సాయంత్రం 3 గంటల 15 నిమిషాలకు సంభవించింది. గాయపడినవారిని ఆర్ఎంఎల్ ఆస్పత్రికి తరలించారు. పేలుడులో గాయపడిన ఇజ్రాయెల్ ఎంబసీ ఉద్యోగిని మాత్రం ఎయిమ్స్‌లో చేర్చారు.

ఢిల్లీలోని తమ ఎంబసీ కార్యాలయం వద్ద పేలుడు ఉగ్రవాద చర్యేనని ఇజ్రాయెల్ ప్రభుత్వం వ్యాఖ్యానించింది. ఇజ్రాయెల్ రాయవార కార్యాలయాన్ని లక్ష్యంగా చేసుకుని పేలుడుకు పాల్పడ్డారని అభిప్రాయపడింది. ఇజ్రాయెల్ రాయబారి కారులో పేలుడు పదార్థాలు ఉన్నట్లు తెలుస్తోంది. ఇటువంటి దాడులను సహించబోమని ఇజ్రాయెల్ విదేశాంగ శాఖ మంత్రి అన్నారు. పేలుడు సంఘటనపై కేంద్ర హోం శాఖ అన్ని కోణాల్లో దర్యాప్తు చేస్తోంది.

English summary

Blast has been taken place near to PM Manmohan Singh's residence.