టెర్రర్ టార్గెట్ ఇజ్రాయెల్ రాయబారి భార్య: చిదంబరం

By Pratap

Published: Tuesday, February 14, 2012, 13:19 [IST]

హైదరాబాద్: ఉగ్రవాదుల లక్ష్యం ఇజ్రాయెల్ రాయబారి భార్య అని కేంద్ర హోం మంత్రి పి. చిదంబరం అన్నారు. సోమవారం సాయంత్రం ఇజ్రాయెల్ రాయబార కార్యాలయానికి చెందిన కారులో బాంబు పేలిన సంఘటనపై ఆయన మంగళవారం మీడియా ప్రతినిధులతో మాట్లాడారు. ఇజ్రాయెల్ కార్యాలయం వద్ద సంభవించిన పేలుడు ఉగ్రవాదుల చర్యేనని ఆయన అన్నారు. బైక్‌పై వచ్చిన ఓ వ్యక్తి కారుకు బాంబును అమర్చాడని ఆయన చెప్పారు. ఆ బైక్ కోసం గాలిస్తున్నట్లు ఆయన తెలిపారు. సంఘటనపై పూర్తి స్థాయిలో దర్యాప్తు సాగుతోందని ఆయన అన్నారు.

సుశిక్షితుడైన వ్యక్తే కారుకు బాంబును అమర్చాడని ఆయన అన్నారు. బాంబు పెట్టిన వ్యక్తి వెళ్లిపోయిన నాలుగైదు సెకన్లకే పేలుడు సంభవించిందని ఆయన చెప్పారు. సిసిటివి కెమెరా ఫుటేజ్‌ను పరిశీలించామని, మోటార్ సైకిల్‌కు సంబందించిన స్పష్టమైన చిత్రం లభించడం లేదని, నెంబర్ ప్లేటు కూడా కనిపించడం లేదని ఆయన అన్నారు. మోటార్ సైక్లిస్టును పట్టుకోవడానికి ప్రత్యేక బృందాలను ఏర్పాటు చేసినట్లు ఆయన తెలిపారు. విదేశాంగ మంత్రి ఎస్ఎం కృష్ణతో పాటు తామంతా ఇజ్రాయెల్ ప్రభుత్వంతో ఎప్పటికప్పుడు మాట్లాడుతున్నామని ఆయన చెప్పారు.

పేలుడులో గాయపడిన ఇజ్రాయెల్ మహిళ ఆరోగ్యం నిలకడగా ఉందని, ప్రమాదం నుంచి బయటపడిందని ఆయన చెప్పారు. పేలుడులో గాయపడిన ఇతర వ్యక్తుల పరిస్థితి కూడా బాగానే ఉందని ఆయన చెప్పారు. ఈ సంఘటనపై ఢిల్లీ పోలీసు కమిషనర్ సాయంత్రం ప్రకటన చేస్తారని ఆయన చెప్పారు.

Published On February 14, 2012