సిఎంను మార్చేదిలేదు: యడ్డీ అల్టిమేటంపై నితిన్ గడ్కరీ

By Srinivas

Published: Friday, February 24, 2012, 11:28 [IST]

బెంగళూరు: కర్నాటక రాజకీయం మరోసారి రసకందాయంలో పడింది. ముఖ్యమంత్రిని మార్చే ప్రసక్తి లేదని భారతీయ జనతా పార్టీ జాతీయ అధ్యక్షుడు నితిన్ గడ్కరీ శుక్రవారం కర్నాటక మాజీ ముఖ్యమంత్రి, బిజెపి నేత యడ్యూరప్పకు తేల్చి చెప్పారు. అంతేకాదు ఈ రోజు జరిగే చింతన్ బైఠక్‌లో ఆందోళన చేస్తే చూస్తూ ఊరుకోమని కూడా యడ్డీ వర్గానికి బిజెపి అధిష్టానం హెచ్చరికలు జారీ చేసింది. ముఖ్యమంత్రి పదవి ఇచ్చేది లేదని గడ్కరీ తేల్చి చెప్పడంతో యడ్డీ, ఆయన వర్గం ఒక్కసారిగా నిరుత్సాహంలో మునిగి పోయింది. చింతన్ బైఠక్‌కు వెళ్లవద్దని నిర్ణయించుకుంది. అయితే పార్టీ సీనియర్ నేత జగదీష్ శెట్టార్ యడ్డీతో మంతనాలు జరిపి బైఠక్‌కు వచ్చేందుకు ఒప్పించారని సమాచారం. సమావేశంలో ఆందోళన చేయాలని యడ్డీ వర్గం నిర్ణయించుకుంటే అలా చేయవద్దని అధిష్టానం హెచ్చరించింది.

కాగా తనను ఈ నెల 27లోగా ముఖ్యమంత్రిని చేయాలని యడ్యూరప్ప గురువారం అధిష్ఠానానికి ఆల్టిమేటం జారీ చేసిన విషయం తెలిసిందే. ఆలోగా తనకు సిఎం పదవి అప్పగించకపోతే కఠిన నిర్ణయం తప్పదని ఆయన హెచ్చరికలు పంపారని వార్తలు వచ్చాయి. ఈ నేపథ్యంలో పార్టీ పరిస్థితిపై రెండు రోజులు సాగే చింతన్ బైఠక్ కోసం శుక్రవారం రావాల్సిన పార్టీ అధ్యక్షుడు నితిన్ గడ్కరీ గురువారం రాత్రే హుటాహుటిన నగరానికి చేరుకున్నారు. రాష్ట్ర పాడి పరిశ్రమ సమాఖ్య అధ్యక్ష పదవి కూడా దక్కించుకోలేక నిరాశలో మునిగిన గౌడను ఏరికోరి పీఠం ఎక్కిస్తే ఆయన తనకే ఎదురు తిరగడాన్ని యడ్డి జీర్ణించుకోలేకపోతున్నారట.

ఈ మేరకు తన మద్దతుదారులైన 60 మంది ఎమ్మెల్యేలు సహా మంత్రులు, ఎమ్మెల్సీలు, ఎంపీలు మొత్తం 90 మందితో కీలక భేటీ కూడా నిర్వహించారు. పార్టీ ఇలా రెండు శిబిరాలుగా చీలిపోవడం గడ్కరీకి అగ్నిపరీక్ష కానుంది. సమస్యకు పరిష్కారంలో భాగంగా యడ్యూరప్పకు రాష్ట్ర పార్టీ పగ్గాలు అప్పగించాలని ఆయన భావిస్తున్నట్లు సమాచారం.

Published On February 24, 2012