సిఎం పదవిని చేపట్టే అర్హత నాకు ఉంది: జానా రెడ్డి

By Pratap

Published: Monday, February 27, 2012, 17:57 [IST]

న్యూఢిల్లీ: రాష్ట్ర ముఖ్యమంత్రి అయ్యే అర్హత ఉన్నవారిలో తాను ఒక్కడినని రాష్ట్ర పంచాయతీరాజ్ మంత్రి కె. జానా రెడ్డి అన్నారు. అయితే ప్రస్తుత పరిస్థితిలో ముఖ్యమంత్రి పదవిని నిర్వహించడం చాలా కష్టమని ఆయన సోమవారం మీడియా ప్రతినిధులతో అన్నారు. ప్రస్తుతం మంత్రి పదవి బాగుందని ఆయన అభిప్రాయపడ్డారు. 2014 తర్వాత కూడా తెలంగాణ ఉద్యమం కొనసాగుతుందని ఆయన అన్నారు. ఉప ఎన్నికల ప్రచారంపై ఇంకా ఆలోచించలేదని ఆయన అన్నారు. రాష్ట్రంలో ఎన్నికల సంఘాన్ని బలోపేతం చేయడానికి తాను కేంద్రంతో చర్చలు జరిపినట్లు ఆయన తెలిపారు.

కోర్టుల్లో కేసులు ఉన్నందు వల్లనే స్థానిక సంస్థల ఎన్నికలు ఆలస్యమవుతున్నాయని ఆయన అన్నారు. తాము స్థానిక సంస్థల ఎన్నికలకు సిద్ధంగా ఉన్నామని ఆయన చెప్పారు. ఎన్నికల నిర్వహణ సుప్రీంకోర్టు తీర్పుపై ఆధారపడి ఉందని ఆయన చెప్పారు. ఎన్నికలు జరుగుతుంటే తమ కాంగ్రెసు పార్టీకి ఎన్ని సీట్లు వస్తాయో అంచనా వేయడం సరి కాదని ఆయన అన్నారు. ఏ పార్టీకైనా అన్ని సీట్లు గెలవాలని ఉంటుందని, అది ప్రజల తీర్పుపై ఆధారపడి ఉంటుందని, తాము ప్రజా తీర్పును గౌరవిస్తామని ఆయన చెప్పారు. ఎన్ని సీట్లు గెలుస్తామనే విషయాన్ని తాను పార్టీ అంతర్గత సమావేశంలో చెబుతానని ఆయన అన్నారు.

Published On February 27, 2012