విశాఖపై నేను ఇప్పుడే ఆలోచించడం లేదు: పురంధేశ్వరి

By Srinivas

Published: Sunday, March 4, 2012, 15:41 [IST]

హైదరాబాద్: రెండేళ్ల తర్వాత వచ్చే ఎన్నికల గురించి తాను ఆలోచించడం లేదని కేంద్ర మానవ వనరుల సహాయ మంత్రి, స్వర్గీయ నందమూరి తారక రామారావు కూతురు దగ్గుపాటి పురంధేశ్వరి ఆదివారం చెప్పారు. ఆమె హైదరాబాదులో ఓ కార్యక్రమంలో పాల్గొనేందుకు వచ్చారు. ఈ సందర్భంగా విలేకరులు ఆమెను విశాఖపట్నం పార్లమెంటు నియోజకవర్గంపై ప్రశ్నించారు. ఆమె దానిపై క్లారిటీ ఇచ్చారు. ఎన్నికలకు మరో రెండేళ్ల సమయముందని ఆలాంటప్పుడు ఇప్పుడే తాను దాని గురించి ఆలోచించడం లేదని చెప్పారు. మంత్రిగా తాను చేయాల్సిన పనిపై దృష్టి సారిస్తున్నానని చెప్పారు. ఎంపిగా తన నియోజకవర్గానికి పూర్తి చేయాల్సింది ఇంకా ఉందన్నారు. రాష్ట్రంలో మారుతున్న రాజకీయాల గురించి మాట్లాడేందుకు ఆమె నిరాకరించారు. వ్యవసాయానికి, వైద్యానికి చేసిన రుణాలతోనే ఆత్మహత్యలు జరిగాయని సర్వేలు చెబుతున్నాయని ఆమె అన్నారు.

కాగా గత కొన్నాళ్లుగా విశాఖపట్నం పార్లమెంటు సభ్యత్వంపై గందరగోళం చెలరేగుతున్న విషయం తెలిసిందే. తాను వచ్చే ఎన్నికల్లో విశాఖపట్నం నుండి పార్లమెంటు సభ్యుడిగా పోటీ చేస్తానని సుబ్బిరామి రెడ్డి చెప్పిన విషయం తెలిసిందే. అయితే పురంధేశ్వరి మాత్రం గతంలో మాట్లాడుతూ విశాఖ నుండి తానే పోటీ చేస్తానని, అయినా ఎన్నికలకు సమయం ఉన్నందున ఇప్పుడేమీ మాట్లాడనని చెప్పారు. తాజాగా మరోసారి ఆమె విశాఖపై అప్పుడే చెప్పేందుకు నిరాకరించారు.

Published On March 4, 2012