ప్రచారానికి చిరు రెడీ: తెలంగాణ నేతల వ్యతిరేకత

By Pratap

Published: Tuesday, March 6, 2012, 20:00 [IST]

హైదరాబాద్: పార్టీ నాయకత్వం ఆదేశిస్తే తాను తెలంగాణ ఉప ఎన్నికల్లో ప్రచారం చేయడానికి సిద్ధంగా ఉన్నానని కాంగ్రెసు నాయకుడు మెగాస్టార్ చిరంజీవి అన్నారు. కోవూరులో ఆయన ప్రచారం చేయనున్నారు. అయితే, చిరంజీవి తెలంగాణలో ప్రచారం చేసే విషయంపై ఏ విధమైన కదలిక లేదు. తెలంగాణలో చిరంజీవి ప్రచారం వల్ల ప్రతికూల ప్రభావం పడవచ్చుననే భయం కాంగ్రెసు నాయకత్వంలో ఉన్నట్లు తెలుస్తోంది. అందుకే తెలంగాణలో చిరంజీవిని ప్రచారానికి దించకూడదని అనుకుంటున్నట్లు తెలుస్తోంది.

చిరంజీవి ప్రచారంపై తెలంగాణకు చెందిన మంత్రి కె. జానా రెడ్డి మంగళవారం చేసిన ప్రకటన తెలంగాణ నాయకుల్లోని వ్యతిరేకతను సూచిస్తోంది. చిరంజీవి అవసరం ఎవరికి ఉందో వారే ఆయనను ఆహ్వానించాలని జానా రెడ్డి ఆయన అన్నారు. నల్లగొండ జిల్లాకు చెందిన సీనియర్ శాసనసభ్యుడు ఆర్. దామోదర్ రెడ్డి కూడా చిరంజీవి ప్రచారంపై వ్యతిరేకతను వ్యక్తం చేశారు. తెలంగాణలో ప్రచారానికి చిరంజీవి రావద్దని ఆయన బహిరంగంగానే చెప్పారు.

కాగా, విభజనపై జిమ్మిక్కులు చేస్తే పరాభవం తప్పదని, ఉత్తరప్రదేశ్ ఎన్నికల ఫలితాలే ఇందుకు నిదర్శనమని జానా రెడ్డి అన్నారు. తెలంగాణను యుపి విభజనతో పోల్చడం సరి కాదని ఆయన అన్నారు. ఉప ఎన్నికలు రెఫరెండం కాదన్న ముఖ్యమంత్రి కిరణ్ కుమార్ రెడ్డి అభిప్రాయంతో తాను ఏకీభవిస్తున్నట్లు ఆయన తెలిపారు.

Published On March 6, 2012