సిఎం రేసులో లేను: అఖిలేష్, మాయావతి రాజీనామా!

By Srinivas

Published: Tuesday, March 6, 2012, 14:54 [IST]

లక్నో: తాను ముఖ్యమంత్రి రేసులో లేనని సమాజ్ వాది పార్టీ నేత, ములాయం సింగ్ యాదవ్ తనయుడు అఖిలేష్ యాదవ్ మంగళవారం స్పష్టం చేశారు. తన తండ్రి ములాయం ముఖ్యమంత్రి పీఠాన్ని అధిష్టిస్తారని ఆయన చెప్పారు. సమాజ్ వాది పార్టీకి పట్టం కట్టిన ప్రజలకు ఆయన ఈ సందర్భంగా కృతజ్ఞతలు తెలిపారు. తాము అధికారంలోకి వచ్చాక మాయావతి విగ్రహాలు తొలగించమని అఖిలేష్ చెప్పడం గమనార్హం. సాధారణ మెజార్టీ వస్తుందని తాము ఆశిస్తున్నట్లు చెప్పారు. కాగా ముఖ్యమంత్రిని ఎన్నుకునేందుకు సమాజ్ వాది పార్టీ పార్లమెంటరీ బోర్డు సమావేశం కానుంది. చాలామంది అఖిలేష్ యాదవ్ ముఖ్యమంత్రి అవుతారని భావించారు. అయితే ఆ వార్తలను అఖిలేష్ కొట్టి పారేయడం విశేషం. కాగా బహుజన్ సమాజా పార్టీ అధ్యక్షురాలు, ముఖ్యమంత్రి మాయావతి మంగళవారం గవర్నర్ అపాయింట్ మెంట్ కోరారు. యుపి ఎన్నికల్లో బిఎస్పీ రెండో స్థానంతో సరిపెట్టుకోవడంతో మాయ మధ్యాహ్నం గం.3.30లకు గవర్నర్ ను కలిసి రాజీనామా సమర్పించనున్నారు.

ఉత్తర ప్రదేశ్ ఎన్నికల ఫలితాలపై ఏఐసిసి అధ్యక్షుడు రాహుల్ గాంధీ ఒక్కడినే బాధ్యుడిని చేయడం సరికాదని పిసిసి అధ్యక్షురాలు రీటా బహుగుణ అన్నారు. యుపి ఫలితాలు దిగ్భ్రాంతిని కలిగించాయని అన్నారు. అయితే ప్రజల తీర్పును గౌరవిస్తామని చెప్పారు. రాహుల్ ఒక్కరే ఫలితాలకు బాధ్యులు కారని మరో నేత అయ్యర్ అన్నారు. ఆయన చరిష్మాతోనే ఆ కొద్ది సీట్లు గెలిచామన్నారు. ఐదు రాష్ట్రాల ఫలితాలపై యుపిఏ చైర్ పర్సన్ సోనియా గాంధీ మధ్యాహ్నం దిగ్విజయ్ సింగ్ తో భేటీ కానున్నారు. యుపిలో 46 జిల్లాలో కాంగ్రెసు అడ్రస్ లేకుండా పోయింది. ఎస్పీ తొమ్మిది జిల్లాల్లో క్లీన్ స్వీప్ చేసింది.

Published On March 6, 2012