వాళ్లు కుమ్మక్కయ్యారు, మీరు ఆలోచించండి: జగన్

By Srinivas

Published: Wednesday, March 14, 2012, 18:29 [IST]

నెల్లూరు: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి బుధవారం శ్రీ పొట్టి శ్రీరాములు నెల్లూరు జిల్లాలో కొవూరు ఉప ఎన్నికల ప్రచారంలో కాంగ్రెసు, తెలుగుదేశం పార్టీలపై మండిపడ్డారు. టిడిపి, కాంగ్రెసు కుమ్మక్కై వైయస్సార్ కాంగ్రెసు పార్టీని అడ్డుకోవాలని చూస్తున్నాయని విమర్శించారు. పార్టీని ఎదగనివ్వకుండా కుయుక్తులు పన్నుతున్నారని విమర్శించారు. తెలుగుదేశం పార్టీ అధినేత నారా చంద్రబాబు నాయుడు సన్నిహితులకు మాజీ ముఖ్యమంత్రి, ప్రస్తుత తమిళనాడు గవర్నర్ కొణిజేటి రోశయ్య అమీర్ పేట భూములు కేటాయించారని విమర్శించారు. చంద్రబాబును ప్రసన్నం చేసుకోవడానికే కాంగ్రెసు ఆయన సన్నిహితుడికి భూములు కేటాయించిందన్నారు. ఓటర్లు విజ్ఞతతో ఓటు హక్కు వినియోగించుకోవాలని కోరారు. కాంగ్రెసు, టిడిపి కలిసి ఆర్టీఐ కమిషనర్లను చెరి సమానంగా పంచుకున్నారన్నారు. రాష్ట్ర చరిత్రలో ఎప్పుడూ జరగని కుట్ర ఇప్పుడు జరుగుతోందన్నారు.

ఉప ఎన్నికలకు దారితీసిన పరిస్థితులను ఆయన ప్రజలకు వివరించారు. దివంగత ముఖ్యమంత్రి వైయస్ రాజశేఖర రెడ్డి ప్రవేశ పెట్టిన పథకాలు కాంగ్రెసు ప్రభుత్వం నీరుగారుస్తుందని విమర్శించారు. కాగా వైయస్ జగన్మోహన్ రెడ్డి కొవూరులో రెండో విడత ఎన్నికల ప్రచారం నిర్వహిస్తున్నారు. బుచ్చిరెడ్డిపాలం, కొవూరు మండలాల్లో పర్యటిస్తున్నారు. జగన్‌తో పాటు ఆ పార్టీ అభ్యర్థి నల్లపురెడ్డి ప్రసన్న కుమార్ రెడ్డి, తాజా మాజీ ఎంపీ మేకపాటి రాజమోహన్ రెడ్డి ప్రచారంలో పాల్గొన్నారు. జగన్ ఎన్నికల గుర్తు సీలింగ్ ఫ్యాన్‌ను చూపిస్తూ ప్రచారం చేస్తున్నారు.

Published On March 14, 2012