మోహన్ బాబును రాజకీయాల్లోకి ఆహ్వానించిన బాబు

By Srinivas

Published: Tuesday, March 20, 2012, 9:22 [IST]

చిత్తూరు: కలెక్షన్ కింగ్ మోహన్ బాబును తెలుగుదేశం పార్టీ అధినేత నారా చంద్రబాబు నాయుడు రాజకీయాల్లోకి ఆహ్వానించారు. సోమవారం మోహన్ బాబు పుట్టిన రోజు సందర్భంగా చంద్రబాబు చిత్తూరులోని శ్రీ విద్యానికేతన్‌లో జరిగిన ముఖ్య అతిథిగా హాజరయ్యారు. ఈ సందర్భంగా ఆయన మాట్లాడారు. మోహన్ బాబు రాజకీయాల్లోకి రావాలని చంద్రబాబు సూచించారు. తమ మధ్య ఎలాంటి విభేదాలు లేవని చెప్పారు. ఇన్నాళ్లు మోహన్ బాబు తన పని తాను చేసుకు వెళ్లారని, నేను నా పని చేసుకొని వెళ్లానని చెప్పారు. అందుకే కలుసుకోలేక పోయామన్నారు. ఇక నుండి ఇద్దరం కలిసే ముందుకు వెళతామని చెప్పారు. ఆయన రాజకీయాల్లోకి వస్తే తాను స్వాగతిస్తానని చెప్పారు.

అనంతరం మోహన్ బాబు మాట్లాడుతూ.. చంద్రబాబు రాష్ట్రాన్ని తొమ్మిదేళ్లు పాలించి రాష్ట్రాన్ని సర్వతోముఖాభివృద్ధి చేశారని అన్నారు. ఆయన పాలన అభివృద్ధికి సోపానం అన్నారు. ఐటి రంగంలో ప్రపంచానికి ధీటుగా హైదరాబాదును నిలిపారన్నారు. నేను ఏ పార్టీకి సంబంధించని వ్యక్తిగా చంద్రబాబు పాలనను మెచ్చుకుంటున్నానని చెప్పారు. చంద్రబాబు రాష్ట్రాన్ని నిజాయితీగా పాలించారన్నారు. ఇప్పుడు కొందరు ఎలాంటి పరిస్థితుల్లో ఉన్నారో చూస్తున్నామని అన్నారు. రాజకీయ ఆరంగేట్రంపై విలేకరులు ప్రశ్నించగా.. దానిపై స్పందించేందుకు ఇది సరైన వేదిక కాదని చెప్పారు.

Published On March 20, 2012