సమైక్యాంధ్రకే అధిష్టానంపై ఒత్తిడి తెస్తాం: శైలజానాథ్

By Pratap

Published: Tuesday, March 27, 2012, 18:36 [IST]

న్యూఢిల్లీ: సమైక్యాంధ్రకే కట్టుబడి ఉండాలని తమ కాంగ్రెసు పార్టీ అధిష్టానంపై ఒత్తిడి తెస్తామని రాయలసీమకు చెందిన రాష్ట్ర మంత్రి శైలజానాథ్ చెప్పారు. తమ నినాదం సమైక్యవాదమేనని ఆయన మంగళవారం మీడియా ప్రతినిధులతో చెప్పారు. విద్యార్థులను రాజకీయాలకు పావులుగా వాడుకోవద్దని ఆయన సూచించారు. సమైక్యాంధ్ర కోసం తాము దేనికైనా సిద్ధమని ఆయన చెప్పారు. తెలంగాణపై త్వరతిగతిన నిర్ణయం తీసుకోవాలని ఆయన పార్టీ అధిష్టానాన్ని కోరారు. ఏది జరిగిన శాస్త్రబద్దంగా జరగాలనేది తమ ఉద్దేశమని ఆయన చెప్పారు.

ముఖ్యమంత్రి కిరణ్ కుమార్ రెడ్డిపై కాంగ్రెసు పార్టీ సీనియర్లు విమర్శలు చేయడాన్ని ఆయన తప్పు పట్టారు. సీనియర్లు విమర్శలు చేయడం మానుకుని పార్టీ అభివృద్ధికి కృషి చేయాలని ఆయన సూచించారు. ముఖ్యమంత్రి కిరణ్ కుమార్ రెడ్డి క్రమశిక్షణతో పనిచేస్తున్నారని ఆయన ప్రశంసించారు. కిరణ్ కుమార్ రెడ్డి నాయకత్వంలో కాంగ్రెసు పార్టీ బలపడిందని ఆయన అభిప్రాయపడ్డారు.

Published On March 27, 2012