ఎమ్మార్ కేసు:బాలకృష్ణ సతీమణి వసుంధర వాంగ్మూలం

హైదరాబాద్: ఎమ్మార్ ప్రాపర్టీస్ మణికొండలో చేపట్టిన ప్రాజెక్టులో చదరపు గజం రూ.5వేలు చొప్పున 2,440 చదరపు గజాలున్న రెండు ఫ్లాట్లు కొన్నట్లు నందమూరి హీరో బాలకృష్ణ భార్య వసుంధర సిబిఐకి చెప్పారు. ఈ ప్రాజెక్టు విషయమై మిత్రుల నుంచి వివరాలు తీసుకొని ప్లాటు నిమిత్తం కె.శ్రీనివాస రావును సంప్రదించానని చెప్పారు. 2007 జనవరిలో 2,000 చదరపు గజాల ప్లాటును బుక్ చేసుకున్నట్లు చెప్పారు. దీనికి సంబంధించి కొంత మొత్తాన్ని చెక్‌ల ద్వారా చెల్లించినట్లు తెలిపారు. అనంతరం ఆగస్టు 2008లో తాను తీసుకున్న ప్లాటుకు బదులుగా 2,440 గజాల విస్తీర్ణం ఉన్న వేరే ప్లాట్లను కేటాయించినట్లు ఎమ్మార్ హిల్స్ నుంచి తనకు సమాచారం వచ్చిందని వసుంధర చెప్పారు.

దీనికి సంబంధించి ఎమ్మార్ ఎంజిఎఫ్, ఎమ్మార్ హిల్స్, స్టైలిష్ హోమ్స్ పేరుతో చెల్లింపులు చేసినట్లు చెప్పారు. ఈ ప్లాట్లను ఆమెరికాలో ఎంబిఏ చేస్తున్న తన కుమార్తె బ్రాహ్మిణి పేరితో రిజిస్టర్ చేయించాలని, దీనికి సంబంధించిన అధికారాన్ని శ్రీనివాస రావుకు అప్పగించినట్లు చెప్పారు. కాగా వసుంధర గత సంవత్సరం సెప్టెంబర్ 16న వెల్లడించిన వివరాల ప్రకారం ఆమెను 108వ సాక్షిగా సిబిఐ ఛార్జీషీట్‌లో పేర్కొంది.

English summary

Hero Balakrishna wife Vasundhara declaration before CBI in EMAAR case.