బావ చంద్రబాబుపై మళ్లీ అలిగిన నందమూరి హరికృష్ణ

By Pratap

Published: Wednesday, March 28, 2012, 12:54 [IST]

న్యూఢిల్లీ: బావ, తెలుగుదేశం పార్టీ అధ్యక్షుడు నారా చంద్రబాబు నాయుడిపై పార్లమెంటు సభ్యుడు నందమూరి హరికృష్ణ మరోసారి అలిగారు. రాజ్యసభ అభ్యర్థుల ఎంపికపై అసంతృప్తికి గురైన ఆయన చంద్రబాబుపై అలిగినట్లు చెబుతున్నారు. తెలుగుదేశం పార్లమెంటరీ పార్టీ (టిడిపిపి) కార్యాలయం వెలుపల కూర్చుని ఆయన తన నిరనసను తెలియజేశారు. తెలుగుదేశం వ్యాపారవేత్తల పార్టీ అయిందని ఆయన తన సన్నిహితుల వద్ద ఆవేదన వ్యక్తం చేసినట్లు తెలుస్తోంది.

రాజ్యసభకు టి. దేవేందర్ గౌడ్‌ను, సిఎం రమేష్‌ను ఎంపిక చేయడంపై చంద్రబాబుపై చాలా మంది పార్టీ సీనియర్ నేతలు ఇప్పటికే గుర్రుగా ఉన్నారు. టి. దేవేందర్ గౌడ్‌కు రాజ్యసభ సీటు ఇవ్వడంపై తలసాని శ్రీనివాస యాదవ్ అలిగినట్లు ఇప్పటికే వార్తలు వచ్చాయి. దేవేందర్ ఎంపికను నిరసిస్తూ తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర్ రావు తీవ్ర నిరసన వ్యక్తం చేస్తూ ఫోరం కన్వీనర్ పదవికి రాజీనామా చేసినట్లు తెలుస్తోంది. అయితే చంద్రబాబు బుజ్జగించడంతో ఆయన వెనక్కి తగ్గినట్లు చెబుతున్నారు.

Published On March 28, 2012