వైయస్ జగన్ పోస్టు కార్డును వాడుకుంటారా?

హైదరాబాద్: ఆధునిక సమాచార వినిమయ సౌకర్యాలు అందుబాటులోకి వచ్చిన తర్వాత ఉత్తరాలు రాయడమనేది దాదాపుగా మరిచిపోయినట్లే అయింది. కానీ వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఇప్పుడు ఆ అవకాశాన్ని వాడుకోవచ్చు. ఉప ఎన్నికలు జరుగుతున్న నేపథ్యంలో ప్రజలనుద్దేశించి ప్రసంగించడానికి ఆధునిక మీడియా అందుబాటులో లేదు. మీడియాతో మాట్లాడడానికి అవకాశం ఇవ్వాలని కోరుతూ ఆయన దాఖలు చేసిన పిటిషన్ ఈ నెల 21వ తేదీకి వాయిదా పడింది.

ఉప ఎన్నికల సందర్బంగా ఓటర్లకు విజ్ఞప్తి చేయడానికి ఆధునిక సౌకర్యాలు ఆయనకు అందుబాటులోకి వచ్చే అవకాశం లేదు. ఈ నెల 12వ తేదీన 18 శానససభా స్థానాలకు, ఓ లోకసభ స్థానానికి ఉప ఎన్నికలు జరుగుతున్నాయి. ఈ స్థితిలో ఆయన పోస్టు కార్డులను వినియోగించుకునే వీలుంది.

జైలు మాన్యువల్ ప్రకారం - ఖైదీ పక్షం రోజుల్లో ప్రభుత్వం ఖర్చుతో ఓ పోస్టు కార్డు వాడుకోవచ్చు. అండర్ టర్యల్ ఖైదీ ఆ పోస్టు కార్డును తన కుటుంబ సభ్యులకు, బంధువులకు లేదా మిత్రులకు ఉత్తరం రాయడానికి పోస్టు కార్డును వాడుకోవచ్చు. అయితే, పోస్టు కార్డులోని విషయాన్ని జైలు అధికారులు సెన్సార్ చేస్తారు. అభ్యంతరకరమైన విషయాలు లేకుండా చూస్తారు.

ఈ స్థితిలో వైయస్ జగన్ పోస్టు కార్డును వాడుకుని ఓటర్లకు ఏదో రూపంలో విజ్ఞప్తి చేసుకునే అవకాశాలున్నాయి. అయితే వైయస్ జగన్మోహన్ రెడ్డికి ఉత్తరం రాయవచ్చుననే ఐడియా వస్తుందా, ఆయనకు ఈ ఐడియాను ఎవరైనా అందజేస్తారా అనేది చూడాల్సిన విషయం. పోస్టు కార్డు ధర యాభై పైసలు మాత్రమే. దాని ఖర్చును కూడా ప్రభుత్వం భరిస్తుంది.

English summary

The postcard costing .50 paise could well be the last resort of YSR Congress party leader Y S Jaganmohan Reddy to connect with people who matter to him most at this crucial juncture. If he wants, that is.