సుదర్శన్ అదృశ్యం: వెనక్కి తెచ్చిన కొరియర్‌ బాయ్

బెంగళూరు: రాష్ట్రీయ స్యయంసేవక సంఘ్(ఆర్ఎస్ఎస్) మాజీ చీఫ్ సుదర్శన్ శుక్రవారం ఉదయం అదృశ్యమయ్యారు. ఉదయం పూట మార్నింగ్ వాక్‌కు వెళ్లిన ఆయన ఆ తర్వాత కనిపించకుండా పోయారు. ఆయన వయస్సు 81. ఆయన కనిపించకుండా పోవడంతో ఆయనను ఎవరైనా కిడ్నాప్ చేశారా అనే అనుమానాలు పలువురిలో తలెత్తాయి. అయితే ఆయన వయస్సు దృష్ట్యా కిడ్నాప్ చేసే అవకాశాలు లేవని చెబుతున్నారు.

ఆయనకు కొద్దిగా మతిస్థిమితం కోల్పోయారని తెలుస్తోంది. దీంతో ఆయన ప్రతి రోజు ఉదయం మార్నింగ్ వాక్‌కు వెళ్లేటప్పుడు ఆయన వెంట ఓ సహాయకుడు ఉంటారు. ఈ రోజు ఉదయం కూడా మార్నింగ్ వాక్‌కు వెళ్లే సమయంలో సహాయకుడు వచ్చేలోగానే సుదర్శన్‌జీ వాక్ కోసం బయటకు వెళ్లిపోయారని తెలుస్తోంది. కాస్త మతిస్థిమితం కోల్పోవడం, సహాయకుడు వెంట లేక పోవడం కారణంగా ఆయన దారి తప్పి ఉంటారని భావిస్తున్నారు.

సుదర్శన్ అదృశ్యమైనట్లు మైసూరులోని నజరబాద్ పోలీసు స్టేషన్‌లో ఫిర్యాదు నమోదయింది. ఆయన ఆచూకీ కోసం మైసూరు శివార్‌లలోని సుమారు 25 కిలోమీటర్ల పరిధిలో పోలీసులు తీవ్రంగా గాలింపు చర్యలు చేపట్టారు. ఆయన దారి తప్పి ఉంటారని ఆయన దొరుకుతారని సంఘ్ కార్యకర్తలు ఆశాభావం వ్యక్తం చేస్తున్నారు. సుదర్శన్‌జీ 2000-2009 మధ్య రాష్ట్రీయ స్వయంసేవక సంఘ్ చీఫ్‌గా పని చేశారు.

కాగా పోలీసులు, సంఘ్ కార్యకర్తలు సుదర్శన్‌జీ గురించి తీవ్రంగా గాలించారు. కాసేపటికి ఆయన ఆచూకి లభ్యమైంది. సుదర్శన్‌జీ తన నివాసానికి రెండు కిలోమీటర్ల దూరంలో ఒంటరిగా కూర్చుని కనిపించారు. సుదర్శన్‌ను ఓ కొరియర్ బాయ్ గుర్తించి తీసుకు వచ్చారు.

English summary

Former Rashtriya Swayamsevak Sangh (RSS) chief KS Sudarshan has been reported missing since 7 am Friday morning. He was in Mysore to visit his brother's place. He had left home for morning walk and did not return. A missing complaint has been filed with the Mysore police.