పాక్‌ నుండే చిచ్చు: ఇంటర్నెట్ పేజీల ఖాతాలు బ్లాక్

By Srinivas

Updated: Monday, August 20, 2012, 10:54 [IST]

Assam fallout: Govt blocks 80 internet pages, user accounts

న్యూఢిల్లీ: దేశంలోని పలు రాష్ట్రాలలో ఉన్న ఈశాన్యవాసులకు బెదిరింపులకు కేంద్రం పాకిస్తాన్‌లోనే ఉందని భారత ప్రభుత్వం గుర్తించింది. సోషల్ నెట్ వర్కింగ్ వెబ్ సైట్ల ద్వారా భారతీయుల్లో చిచ్చు పెట్టాలని చూశారు. దీంతో భారతీయుల మధ్య చిచ్చుకు సోషల్‌నెట్ వర్కింట్ సైట్ల ద్వారా యత్నించిన విద్రోహ శక్తులను అణచివేయాలని పాకిస్థాన్‌ను కేంద్ర ప్రభుత్వం కోరింది. ఈ మేరకు మన ఆందోళనను పాకిస్థాన్ హోంశాఖ మంత్రి రెహ్మాన్ మాలిక్‌కు కేంద్ర హోంశాఖ మంత్రి సుశీల్‌ కుమార్ షిండే ఆదివారం తెలియజేశారు.

పాక్ కేంద్రంగా సోషల్‌ నెట్‌వర్కింగ్ సైట్ల ద్వారా తప్పుడు చిత్రాలు, కథనాలను ప్రచారం చేసి మతవిశ్వాసాలను దెబ్బతీయడానికి యత్నించిన వారిపై కఠిన చర్యలు తీసుకోవాలని షిండే కోరారు. అయితే తగిన ఆధారాలు అందిస్తే చర్యలు తీసుకుంటామని మాలిక్ హామీ ఇచ్చారు. అస్సాం హింసకు సంబంధించిన వదంతుల వ్యాప్తిలో పాకిస్థాన్ హస్తం ఉందంని కేంద్ర హోంశాఖ కార్యదర్శి సింగ్ శనివారం చెప్పారు. భారీ సంఖ్యలో మార్ఫింగ్ చిత్రాలను పాకిస్థాన్ నుంచే వెబ్‌సైట్లలోకి ప్రవేశపెట్టారని సింగ్ చెప్పారు.

మరోవైపు ఫేస్‌బుక్, గూగుల్, ట్విట్టర్‌లలోని 80 ఇంటర్నెట్ పేజీలు, ఖాతాలను బ్లాక్ చేయాలంటూ హోంశాఖ ఆదేశాలు జారీ చేసింది. మార్ఫింగ్ చిత్రాలు కలిగున్న 76 వెబ్‌సైట్లను ఇప్పటికే బ్లాక్ చేసింది. కాగా, అసోంలో ఇప్పటికీ హింస చల్లారడం లేదు. శనివారం రాత్రి ధూబ్రి జిల్లాలో జరిగిన ఘర్షణల్లో ఓ వ్యక్తి గాయపడగా.. చిరాగ్ జిల్లాలో కొన్ని ఇళ్లను దుండగులు తగులబెట్టారు.

కాగా, బెంగళూరు-గువహటి ఎక్స్‌ప్రెస్ ట్రైన్ నుంచి కొందరు ప్రయాణికులను గుర్తు తెలియని వ్యక్తులు బయటకు నెట్టేయడంతో ఇద్దరు దుర్మరణం పాలయ్యారు. న్యూజల్‌పాయ్‌గురికి కొద్ది కిలోమీటర్ల దూరంలోని బేలకోబా రైల్వేస్టేషన్ సమీపంలో ఆదివారం జరిగిన ఈ సంఘటనలో మరో ఏడుగురు గాయపడ్డారు.