తెలంగాణ ఇష్యూ: అసలు ఏం జరుగుతోంది?

By Pratap

Published: Thursday, October 11, 2012, 19:27 [IST]

న్యూఢిల్లీ: తెలంగాణ సమస్య పరిష్కారానికి కేంద్ర ప్రభుత్వం లేదా కాంగ్రెసు అధిష్టానం ఏం చేయబోతుందనేది అంతు పట్టని విషయంగా మారింది. పూటకో మాట, రోజుకో మాట కాంగ్రెసు పెద్దల నుంచి వస్తోంది. చర్చలు సాగుతున్నాయంటూనే ఇప్పట్లో నిర్ణయం వెలువడే అవకాశం లేదని చెబుతున్నారు. కేంద్ర హోం మంత్రి సుశీల్ కుమార్ షిండే చేసిన ప్రకటన ఇటీవల సంచలనం సృష్టించింది. తెలంగాణ రాష్ట్ర సమితి (తెరాస) అధ్యక్షుడు కె, చంద్రశేఖర రావుతో తాను చర్చలు జరపలేదని ఆయన చెప్పడం తీవ్ర సంచలనానికి కారణమైంది.

అఖిల పక్ష సమావేశం ఉండదని కూడా ఆయన తేల్చేశారు. దీంతో కెసిఆర్‌పై విమర్శలు ప్రారంభమయ్యాయి. లగడపాటి రాజగోపాల్ వంటి సీమాంధ్ర నాయకులు తాము చెప్పిందే జరుగుతోందని మాట్లాడుతున్నారు. ఈ స్థితిలో తెలంగాణపై ఏం జరుగుతుందనేది చాలా మందికి ఆసక్తికరంగానే ఉంది. సుశీల్ కుమార్ షిండే వంటి నేతలు తెలంగాణకు వ్యతిరేకంగా ప్రకటనలు చేస్తున్నా తెరాస అధ్యక్షుడు కెసిఆర్ మాత్రం నోరు విప్పడం లేదు.

నిజానికి, తెలంగాణపై కాంగ్రెసు అధిష్టానం నిర్ణయం తీసుకుంటుందని ఎవరూ అనుకోవడం లేదు. కెసిఆర్ మాత్రమే చెబుతున్నారని, కెసిఆర్ మాటల్లో ఎంత నిజం ఉందో చెప్పలేమని అంటున్నారు. అయితే, తెరాస వర్గాల్లో మాత్రం విశ్వాసం వ్యక్తమవుతోంది. కెసిఆర్ విశ్వాసానికి లేదా తెరాస వర్గాల నమ్మకానికి అనుకూలంగానే కాంగ్రెసు రాజ్యసభ సభ్యుడు పాల్వాయి గోవర్ధన్ రెడ్డి మాటలు ఉన్నాయి. సుశీల్ కుమార్ షిండేతో కెసిఆర్ మాట్లాడలేదనే విషయం కొత్తదేమీ కాదని అన్నారు. కాంగ్రెసు అధిష్టానం కెసిఆర్‌తో చర్చలు జరుపుతోందని అంటున్నారు.

కాంగ్రెసు అధిష్టానం తెలంగాణపై ఇప్పుడిప్పుడే నిర్ణయం తీసుకునే అవకాశాలు ఉన్నట్లు మాత్రం కనిపించడం లేదు. రాయలసీమకు చెందిన మంత్రి టిజి వెంకటేష్ మాటలే నిజమయ్యే అవకాశాలు కనిపిస్తున్నాయి. సాధారణ ఎన్నికలకు ఆరు నెలల ముందు తెలంగాణపై నిర్ణయం వెలువవడుతుందని ఆయన ఒకటి రెండు సార్లు చెప్పారు. ప్రభుత్వాన్ని కాపాడుకోవడానికే నిర్ణయంలో కాంగ్రెసు జాప్యం చేస్తోందని అంటున్నారు.

తెలంగాణపై నిర్ణయం వెలువరించడానికి కాంగ్రెసు అధిష్టానం సిద్ధపడిన ప్రతిసారీ సీమాంధ్ర నాయకులు అడ్డుపడుతున్నారని పాల్వాయి గోవర్ధన్ రెడ్డి కూడా అన్నారు. అయితే, అన్ని వైపుల నుంచి చర్చలు మాత్రం సాగుతున్నట్లు తెలుస్తోంది.

Published On October 11, 2012