అఫ్జల్ గురుకి ఉరి వేయొద్దు: అంబేడ్కర్ మనవడు

ముంబయి: పార్లమెంటుపై దాడి కేసులో దోషి అయిన అఫ్జల్ గురును ఉరి తీయవద్దని భారిపా బహుజన్ మహాసంఘ్ అధ్యక్షుడు, రాజ్యాంగ నిర్మాత డాక్టర్ బిఆర్ అంబేడ్కర్ మనవడు ప్రకాశ్ అంబేడ్కర్ శనివారం అన్నారు. అఫ్జల్ గురూను ఉరితీయడం కాశ్మీరీ వేర్పాటువాదులలో ఐక్యతకు దారి తీస్తుందన్నారు. అక్కడ ప్రత్యేకవాదుల బలోపేతం కాకుండా ఉండేందుకు అఫ్జల్ గురును ఉరి తీయాలనే డిమాండును పక్కన పెట్టాలని సూచించారు.

భారత్ ఫండమెంటల్ హిందూ నేతలతో పాలింపబడటం లేదన్నారు. భారత్ లౌకికవాద దేశం అని తెలుసుకోవాలన్నారు. అఫ్జల్ గురును ఉరి తీయాలని డిమాండ్ చేయడం ఓటు బ్యాంకు రాజకీయాలో భాగమేనని ప్రకాశ్ అంబేద్కర్ వ్యాఖ్యానించారు. ఈ డిమాండ్ చేస్తున్న పార్టీలకు దేశ ప్రయోజనాలపై ఏమాత్రం ఆసక్తి లేదని ఆయన పేర్కొన్నారు.

కాగా పాకిస్తాన్ ఉగ్రవాది అజ్మల్ కసబ్‌కు పూణేలోని యెరవాడ జైలులో గత నెల 21వ తేదిన ఉరితీసిన విషయం తెలిసిందే. ముంబై ఉగ్రవాద దాడుల్లో దోషిగా తేలిన కసబ్‌కు ఆ రోజు ఏడున్నర గంటలకు ఉరిశిక్ష అమలు చేశారు. రాష్ట్రపతి ప్రణబ్ ముఖర్జీ కసబ్ పెట్టుకున్న మెర్సీ పిటిషన్‌ను తోసిపుచ్చడంతో కసబ్‌ను ఉరితీశారు. కసబ్ ఉరి తర్వాత అఫ్జల్ గురు ఉరి తెరపైకి వచ్చింది. అఫ్జల్ క్షమాభిక్ష పిటిషన్‌ను కూడా రాష్ట్రపతి తోసి పుచ్చినట్లుగా వార్తలు వచ్చాయి.

English summary

Bharipa Bahujan Mahasangh president Prakash Ambedkar Saturday said 2001 parliament attack convict Afzal Guru should not be hanged but sentenced to life imprisonment.