రాజమండ్రి మురళీ మోహన్‌కే, గొల్లపల్లికి అమలాపురం

రాజమండ్రి/హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు అభ్యర్థుల ఖరారుపై దృష్టి సారించినట్లుగా కనిపిస్తోంది. ఎన్నికలు ఎప్పుడు ముంచుకొస్తాయో తెలియని నేపథ్యంలో ఆయన వివాదం లేని చోట అభ్యర్థుల ప్రక్రియను ప్రకటించే పనిలో పడ్డారు. ఒకటి కంటే ఎక్కువ మంది ఉన్నచోట నచ్చజెప్పి ప్రకటించాలని చూస్తున్నారు. చంద్రబాబు తనయుడు నారా లోకేష్ ఇప్పటికే ఆయా అసెంబ్లీ, పార్లమెంటు స్థానాల్లో సర్వే చేసినట్లుగా వార్తలు వచ్చిన విషయం తెలిసిందే.

అన్నింటిని బేరీజు వేసుకొని చంద్రబాబు పలువురి అభ్యర్థిత్వాలను ఖరారు చేసుకున్నారట. అయితే, వాటిని ఎప్పుడు విడుదల చేస్తారనేది సస్పెన్స్‌గా కొనసాగుతోంది. దాదాపు సగానికి పైగా లిస్ట్ ఎప్పుడో తయారయినప్పటికీ ఇదిగో ప్రకటన వెలువడుతుందనే వార్తలు వస్తున్నాయే తప్ప ఇంకా ప్రకటించలేదు. వస్తున్నా మీకోసం పాదయాత్ర చేస్తున్న చంద్రబాబు తన యాత్రలో ఆయా నియోకవర్గాల్లో నిలబెట్టాల్సిన అభ్యర్థి పైన కూడా కసరత్తు చేస్తున్నారు.

తాజాగా చంద్రబాబు చంద్రబాబు పార్లమెంటు నియోజకవర్గానికి ఇంఛార్జిగా నియమించారు. వచ్చే ఎన్నికల్లో వారే పోటీ చేయనున్నారు. తూర్పు గోదావరి జిల్లాలో పాదయాత్ర చేస్తున్న చంద్రబాబు రాజమండ్రి, అమలాపురం పార్లమెంట్ స్థానాలకు పార్టీ అభ్యర్థులను ఖరారు చేశారు. రాజమండ్రికి ఇప్పటికే ప్రజల్లో పనిచేస్తున్న ప్రముఖ సినీ నటుడు మురళీ మోహన్‌ను పేరును గతంలోనే ఖరారు చేశారు.

అమలాపురం లోక్‌సభ నియోజక వర్గానికి గొల్లపల్లి సూర్యారావును ఇంఛార్జిగా నియమించారు. అంతేకాక ఆయనే పార్టీ అభ్యర్థి అని ప్రకటించారు. రాజమండ్రిలో గురువారం జరిగిన కార్యకర్తల సమావేశంలో చంద్రబాబు తన నిర్ణయాన్ని వెల్లడించారు. సూర్యారావుకు మాజీ మంత్రిగా అనుభవం ఉండడమే కాక పలుకుబడి, సమర్థత ఉన్న నాయకుడన్నారు. బాలయోగిలా ధైర్యంగా పనిచేయాలని సూర్యారావుకు సూచించారు.

English summary

Former Minister Gollapalli Surya Rao and Murali Mohan are confirmed for Telugudesam Party MP tickets from Amalapuram and Rajahmundry.