బస్సు యాత్రకు చంద్రబాబు రెడీ: పాదయాత్ర తీరులోనే

హైదరాబాద్: బస్సు యాత్ర చేపట్టేందుకు తెలుగుదేశం పార్టీ అధ్యక్షుడు నారా చంద్రబాబు నాయుడు సిద్ధమయ్యారు. జులైలో బస్సు యాత్ర చేపడుతానని ఆయన మంగళవారం పార్టీ మహానాడులో ప్రకటించారు. బస్సు యాత్ర మీకోసం.. పాదయాత్ర తరహాలోనే ఉంటుందని ఆయన చెప్పారు. తాను 16 జిల్లాల్లో పాదయాత్ర చేశానని, పాదయాత్ర చేయని జిల్లాలకు బస్సు యాత్రలో ప్రాధాన్యం ఇస్తానని ఆయన చెప్పారు. బస్సు యాత్ర చేపట్టాలని చాలా మంది సూచించారని, ఆ మేరకు జులైలో బస్సు యాత్ర చేయాలని నిర్ణయించుకున్నానని ఆయన అన్నారు.

కాగా, జూన్‌లో పార్టీ కార్యకర్తలకు హైదరాబాదులో శిక్షణా తరగతులు నిర్వహించనున్నట్లు ఆయన తెలిపారు. శాసనసభా నియోజకవర్గానికి 40 మంది చొప్పున ఎంపిక చేసుకుని శిక్షణ ఇస్తామని చెప్పారు. విద్యుత్తు సమస్యపై 40 లక్షల సంతకాలు సేకరించాలని నిర్ణయించినట్లు తెలిపారు. ఆ సంతకాలను అసెంబ్లీలో ప్రదర్శిస్తామని, ఆ తర్వాత గవర్నర్‌కు సమర్పిస్తామని ఆయన చెప్పారు. ప్రజలతో మమేకం కావడానికి బస్సు యాత్ర చేయనున్నట్లు ఆయన చెప్పారు.

స్థానిక సంస్థల ఎన్నికలను పార్టీ గుర్తుతో నిర్వహించాలని చంద్రబాబు నాయుడు డిమాండ్ చేశారు. స్థానిక సంస్థలపై మహానాడులో ప్రతిపాదించిన తీర్మానంపై ఆయన మంగళవారం ప్రసంగించారు. స్థానిక సంస్థల ఎన్నికల్లో తెలుగుదేశం పార్టీ జెండా ఎగరాలని ఆయన అన్నారు.

తమది నిజాయితీ గల పార్టీ అని, ప్రజలు తమ వెంటే ఉన్నారని ఆయన అన్నారు. దోపిడీ దొంగల పక్కన ఎన్టీఆర్ ఫొటో పెట్టడం బాధగా ఉందని ఆయన వైయస్సార్ కాంగ్రెసు పార్టీ నాయకుల తీరుపై వ్యాఖ్యానించారు. తెలుగుదేశం పార్టీ అధ్యక్షుడిగా నారా చంద్రబాబు నాయుడు మరో సారి ఎన్నిక కానున్నారు. ఈ విషయాన్ని మంగళవారం సాయంత్రం ప్రకటిస్తారు.

English summary

The Telugudesam party president Nara Chandrababu Naidu has decided to takeup bus yatra in July in the lines padayatra.